日本Bandai Spriits旗下有條叫「Best Hit Chronicle (意譯：大賣編年史) 」嘅模型系列，顧名思義就係將過往曾經喺日本大賣嘅產品模型化，頭一彈推出初代Playstation及Sega Saturn主機，就已經憑超級高還原度及大量細節獲得激讚。你以為佢之後都會出類似嘅電子產品？Nonono！佢出嘅係杯麵——合味道杯麵！

杯麵由日清食品創辦人安藤百福研發，最早於1971年喺日本上市，倒熱水入去等三分鐘就食得喺當時黎講可謂驚為天人。到依家杯麵幾乎成為每個屋企宵夜之選、睇波必備、甚至係窮人恩物，相信大家對於一個杯麵入面有啲咩都非常清楚，亦都因為咁你就更能夠欣賞呢個杯麵模型究竟有幾Detail。

個杯似到同實物埋放埋一齊分唔到都算啦，個杯連後面啲說明書都還原咗都算啦，佢連入面啲肉粒、蛋粒、蝦肉同蔥都係粒粒唔同嗰下真係令人佩服呀！

至於點解可以真到咁？就係因為Bandai拎咗個真嘅合味道去做3D Scanning，再將其零件化，砌落真係相當有趣。售價都只係2420Yen，抵玩啦！Btw，當初公佈呢個系列時有個路線圖，當中係有杯珍珠奶茶，依家睇完個杯麵之後真係令人相當期待呢！