泰國人近排好威，能夠擊退國際化的環球網軍，令人對泰國有全新的認知，無錯啦泰國的廣告係全球最有創意，泰國的語言係全球最有喜感，泰國的電影都係全球最有趣，推介呢個全新超爆笑泰國喜劇《又要威，又要除頭盔2》（Bikeman 2），正到炸裂，佢配上港式字幕超搞笑，又食野味又有肺炎我發誓一定要入場睇。大佬最有趣係套笑片係可以直接睇第二集，第一集駛咩理佢！聽講都係同一對男女主角但男主角上集成功由「的士陳」變身銀行經理咁囉。重點只需睇第二集「泰式非常外父」！真係好想即刻免簽證飛去芭提雅 

呢部《又要威，又要除頭盔2》（Bikeman 2）喺泰國名堂響噹噹，係舊告贏得泰片年度開畫票房第三名，係出位胡鬧喜劇，由一大班泰國紅星班底的無厘頭搞笑演繹，再加上貼地的劇情，呈獻出一套為觀眾醒醒神、打打氣的輕鬆小品。最適合而家死氣沉沉香港人開心一番，呢部戲一定要入戲院睇(當然，要留意同根據疫情，唔係叫你而家即衝落戲院！)其中一個落戲院睇的原因係電影的靈魂係貼地的港式幽默字幕，將呢部泰國原作優化成150%搞笑。

同一套戲如果搵內地或者台灣的朋友翻譯字幕肯定會失色不少，就簡單如預告講的飛機師Sam哥同「過泰」航空，「飛機萬里通，篤灰好輕鬆」相信一定係香港人先識得笑的貼地笑位。 

好多人問呢套野無里頭，直接上第2集嗎？其實的確係有第一集，但最新套第二集好笑好睇，你大可以直接睇，等我戲透第一集你知打個底，上集講到男主角偉霆（Peach飾）本身揸的士，但又呃阿媽自己做銀行經理，點知最後居然真係轉行做到銀行仔，仲成功踢走女神男友，與女神樂童（Fon飾）越行越埋。今集就係偉霆同樂童繼續發展，再加埋非常外父泰國「三哥」Somchai Khemklad（Tao）抵死狂野演出。

故事劇情係講一直做兵仔嘅偉霆終於等到女神樂童分左手，仲畀佢撞正絕佳機會食住上：樂童爸爸沙膽由鄉下殺到嚟，迫樂童回鄉相睇；為咗耍走阿爸，樂童哀求偉霆扮自己男朋友，仲叫佢帶埋全家一齊見家長。偉霆阿媽花姐、世叔伯鼎爺同死黨戇呃等人，齊齊夾計扮鬼扮馬，誓要冧掂惡到爆嘅未來外父；可惜個個騎呢百出，結果搞到一鑊粥！本以為外父政策行唔通，誰不知沙膽突然惹上大麻煩，偉霆即刻戴返頭盔、出動「野狼的士GO」，救外父之餘，唔通可以順手抱得女神歸？

日日抗炎人都就嚟癲， 真係好想開開心心睇返套無厘頭搞笑片， 暫時官方宣佈呢套電影係即將上映即係話其實係要等到戲院重新開放先至可以上。戲院解封之日 我肯定自己會忍唔住衝入去帶番個口罩睇返套笑片開心下， 一解自己去唔到芭堤雅之苦， 泰國人呀我撐硬你！