香港反送中運動因政府漠視民意令矛盾有增無減、持續不斷，特別係中港問題更加係越熱越烈。近日著名電子遊戲GTA V就進行更新，並新增香港抗爭者裝備，例如黃色頭盔、「豬咀」、黑衫等等，並因此觸發遊戲中嘅激戰。

GTA V最新嘅更新入面，新增香港抗爭者裝備供玩家更換，只要換上該批新裝備，就會與香港近月嘅抗爭者服飾非常相似。

而配合近期有香港玩家建立起一個叫做「Stand with Hong Kong」嘅公會，大量穿著抗爭裝備嘅玩家因此加入，並於遊戲中特別針對警車作出攻擊，以表達對香港近月警暴問題嘅不滿。而同時，有內地玩家就著起防暴警察嘅裝備，對香港玩家作出攻擊，甚至有偷走水炮車向抗爭裝備玩家作出攻擊。

有指目前內地玩家群因人數上暫時佔有優勢，令香港玩家陷入苦戰，但外界亦踢爆其實GTA於內地係禁止發售嘅遊戲，因遊戲內含有暴力、毒品、色情等元素，所以並禁止。不過，內地玩家可以繞過官方，違法下載呢隻遊戲，並透過內地監控漏洞進行遊戲。