為左唔想得失中國市場(即係為左錢)，唔少人及唔少公司都已經相繼跪低。而最新可能要包括埋電子遊戲平台Steam，因為佢遲遲唔批模擬香港抗爭情況嘅《光復香港》VR遊戲上架。

由Valve公司主理嘅遊戲平台Steam，去年曾公開表示會讓所有遊戲都可以於Steam上架，唯有非法或者亂來嘅遊戲先會被禁止，但可惜由香港開發者設計嘅VR遊戲《光復香港》卻遲遲不被批准上架，疑似係因為背後存有政治考量。

據指遊戲《光復香港》早於今年10月8日已經向Steam提交遊戲，而Steam官方資料顯示通常審批遊戲時間為3-5個星期，但開發者指Steam方面完全沒有回音，甚至其後再向對方查問審批情況亦未有回應。明顯Steam一方正逃避《光復香港》開發者，企圖以唔回應去令遊戲不得在Steam上架，以免得罪中國市場。

《光復香港》呢隻Game，主要係以抗爭者視覺進行，讓玩家感受站於前線嘅第一身感覺，而玩家遊戲中只可以防守，不可以進攻，最多就係可以執起由警方發射嘅催淚彈然後丟回去。所以，單論玩戲角度呢隻Game絕對唔可以用刺激好玩黎形容，反而以生存遊戲角度去體驗更貼切，因為現實中嘅抗爭者於前線中確實非常無助。