「為左XXX，你可以去到幾盡？」呢個問題相信大家都被人問過，而如果你向利物浦領隊高普問「為左贏波，你可以去到幾盡？」相信佢會答你：「無所不用其極，任何方法！」

尋晚「上季歐聯決賽翻版」利物浦大戰熱刺，客隊熱刺憑住哈利簡尼開賽1分鐘就極速門前頭搥「執雞」破門，令主隊利記急於扳平，甚至反勝。

要想追平並唔係你心想就可以，領隊高普一聲令下，原本踢4-3-3嘅利物浦，將兩閘阿諾及羅拔臣推上至成為翼位，後防只餘下兩位中堅雲迪克及洛夫雲，陣式變成罕見嘅2-5-3，雖然阿諾及羅拔臣都會回來防守，但明顯為左增強進攻，後防依然會變得較為薄弱。

高普今次比賽期間放手一搏將陣式變為2-5-3，令球隊中場截擊能力大增，雖然中間亦有走甩嘅驚險時刻，但高風險高回報，喺熱刺門將神勇表現下，利物浦仍然喺52分鐘憑住隊長軒達臣近門左腳窩利，成功扳平比數。扳平後利物浦得勢不饒人繼續強攻，成功由文尼搏得12碼，並由沙拿左腳勁射入網，反超熱刺。

全場下來，憑住高普嘅高風險壓迫性2-5-3陣式，利物浦控球率高達69％，射門高達21次，比熱刺多出10次，中龍利記則達到13次，熱刺則只有4次。

其實相信有跟開高普嘅朋友都知道，以往佢執教多蒙特嘅時候已經時不時有呢種高壓迫防守，雖然消耗球隊不少體力，但卻可以換黎對手不斷犯錯失誤，最終從中得益獲勝。