較早前宣佈將於明年春季推出嘅《魔神英雄傳》最新一輯《魔神英雄傳 七魂的龍神丸》，今日迎來官方更多細節公佈，其中包括故事劇情及隱藏於海報中嘅另外六部機體。

今次官方正式公佈新故事海報中，原本只有剪影嘅另外六部機體，除左海報中正中間位置嘅龍蒼丸之外，其餘六部機體分別為龍戰丸、龍激丸、幻龍丸、聖龍丸、龍虎丸及煌龍丸，從名字及機體嘅外型可以估計，今次主角機體龍蒼丸將會同其餘角色嘅機體，好似戰神丸、邪虎丸等合體或獲得其機體特性。

而睇完主角機體後，今次新一輯嘅《魔神英雄傳》故事講，飛雲將再一次被召喚到創界山，而今次創界山變到上下顛倒，而龍神丸亦因為被邪惡之力封印而變得四分五裂，需要飛雲一步一步將佢結合，從而獲得原來嘅力量，保護創界山。