費格遜領隊領軍嘅時期，曼聯係英超嘅絕對班霸，但自從費Sir退休後，曼聯喺幾位不同嘅領隊領軍下戰績不斷下滑，如今嘅佢地甚至只係比降班區多出2分。不過，曼聯唔單止領隊無能力助曼聯復興，佢地嘅老闆格拉沙家族可能亦都係曼聯墮落嘅關鍵之一。

2005年，格拉沙家族以7.9億鎊成功收購曼聯，時至今日曼聯嘅市值已經接近30億鎊。曼聯為格拉沙家族帶來豐厚嘅收入，但係佢地卻沒有為球隊投入過哪怕係一蚊。因此，喺球隊戰績好時並沒有太多人出黎投訴，但如今球隊戰績一落千丈，球迷當然對球隊擁有人相當不滿。

而日前有傳言指格拉沙家族其中一人奇雲格拉沙有意出售其手中曼聯嘅股份，呢個消息令一眾紅魔球迷非常高興，因為呢一個可能係格拉沙家族離開紅魔嘅第一步。

不過好可惜，最新嘅消息指奇雲格拉沙並無出售曼聯股份嘅意思，令人誤會嘅原因係一份由格拉沙提交給紐約交易所嘅文件，但呢份文件實際上係沒有任何股權變動嘅內容。

因此，格拉沙家族目前仍然掌控曼聯90％嘅服股份，係紅魔鬼最大嘅股東。睇怕格拉沙家族對住曼聯呢隻會生金蛋嘅雞，都無咁易會放手架啦，真係祝各位紅魔球迷好運。