{ SKIP }
文:MenClub 魏文青  
POSTED ON 09 Oct 2019
近來最有話題性嘅電影當然係《Joker》,一來Joaquin Phoenix嘅演技真係令人嘆為觀止,另一方面喺依家嘅香港睇,你都唔知戲院入面定戲院出邊嘅事更加荒謬,成件事就貼身得多。講起性格演員Joaquin Phoenix,《Joker》導演Todd Philips曾經證實Joaquin有時拍拍下會因為自己表演唔好而離場,近日美國著名清談節目主持人Jimmy Kimmel亦喺節目中公佈一段「Joaquin於片場爆粗大鬧攝影師」嘅片段,搞出好一陣熱議…
話說早前Joaquin上咗《Jimmy Kimmel Live》宣傳電影,佢同主持人Jimmy嘅對答氣氛本身就已經相當奇怪,而且如果你睇完套戲先睇個訪問,就更加會覺得成件事同戲中尾段Joker參與《Murray Franklin Show》嘅情況非常類似。不過今日要講嘅重點唔係呢個,而係Jimmy於節目中公開咗一段「絕密片段」,片中只見Joaquin Phoenix化咗一個不完整嘅Joker妝,檯上點起一支煙,埋頭寫緊某啲嘢,同時不停爆粗鬧緊鏡頭後嘅攝影師Lawrence "Larry" Sher,大意就係話Larry嘲笑佢,佢就叫Larry收聲,鬧鬧下更起身離場。

所謂的「絕密片段」由8:27開始

回到Jimmy嘅節目中,Joaquin睇到條片之後顯得非常尷尬,睇落去對條片被公開毫不知情,更多次掩面嘆氣,不停向Larry及觀眾道歉。而觀眾們就認為Jimmy不應該於節目上公開呢段刪剪片段,有公審Joaquin之嫌,Youtube上嘅呢條訪問更有超過5萬個Dislike(但同時有800萬觀看)。另一方面亦有人認為件事只係炒作,一時間眾說紛云。
咁究竟成件事係點呢?最後就由呀攝影師Larry接受網站《Business Insider》訪問時作出解答:其實所謂嘅絕密片段,是Joaquin於片場時想到嘅一個整蠱把戲,但整蠱嘅對象其實係導演Todd Philips。當時Joaquin希望扮發脾氣黎整蠱Todd,事前亦有「通知」Larry,但由於Joaquin實在太好戲,「扮」發脾氣扮到大家以為佢真係發脾氣,所以整蠱失敗。換言之Jimmy Kimmel於節目上播呢條片,以及Joaquin嘅尷尬反應,其實又係另一個整蠱,對象就係全部觀眾,但再一次因為Joaquinn太_好戲,搞到個個都當哂真!
事實上Joaquin都唔只一次「利用」清談節目,2009年時佢上另一著名節目主持人David Letterman嘅節目,表現都係非常奇怪,原來當時佢拍緊《I'm Still Here》,一部以佢本人身份,扮要唔拍戲轉去玩音樂嘅偽紀錄片,所以用埋個節目黎做「劇情」,電影上映後佢仲返去同David Letterman道歉添。其實呢啲方法呢,就真係要好好戲先用得,冇咁好戲又想呃哂全世界,就會被人篤爆篤到Er Er聲啦。
【有傳】Apple AirPods Pro全新「風筒」型耳機將於本月底正式發佈 蘋果最新的AirPods耳機新產品AirPods Pro傳即將推出,根據流出資料,擬風筒式設計的全新AirPods 名為AirPods Pro,具有支援降噪的機能,定位上 ...
hobby
【有傳】Apple AirPods Pro全新「風筒」型耳機將於本月底正式發佈 ... ...
24 Oct 2019
合力捉鬼啦!
hobby
【新Game】《Luigi Mansion 3》深入鬼屋合力捉鬼
24 Oct 2019