一代武打巨星李小龍先生，由1973年離世至今已經46年，但全球Fans數字有增無減，不過可惜嘅係，當中卻唔包括其成長地香港嘅政府，因為喺李小龍會爭取左11年嘅情況下，李小龍位於九龍塘嘅故居今日正式被清拆...

李小龍會於今日喺Facebook page發佈一則消息：「李小龍故居於公歷2019年9月24日，在業主和特區政府棄救下，於今日拆毀，一代巨星故居終作飛灰」，同時其專頁icon亦轉為全黑色，說明會員上下都非常痛心及失望。

李小龍自從1973年突然離世後，其故居「棲鶴小築」翌年由地產富商余彭年買入，並曾出租成為時鐘酒店。其後到2014年余彭年去世後，「棲鶴小築」由余彭年慈善基金會管理，去年底本想改建成國學教育中心，但當準備重建時才發現，故居因日久失修，如要修復將需要花費不少，因此基金會考慮後決定清拆重建。

不過，其實李小龍故居本來可以避免被清拆的，因為只要政府願意出手收購，或用其他方法進行保留，例如為其進行修復成為旅遊景點。但可惜政府始終未能與業主達成共識，因此眼白白睇住能夠作為歷史文物嘅一代巨星故居夷為平地，實在令所有香港人及一眾支持者感到痛心。