近日的其中一個熱話，係出席過撐警活動從而火速得到內地電影上映檔期的梁家輝，成功排檔上映，但是傳票房仆直，全國火力全開上映5天票房只累積得2000萬票房，平均入座率係4人(唔係4成)，幸災樂禍唔係我想帶出的議題，不過未上映前我地都講過此片肯定唔能夠引起觀眾的興趣，因為中國人根本就無日式深夜食堂，完全無呢種文化又何來會睇你套戲？其實香港人見到深夜食堂四隻字倒不如從新細想，回憶一下屬於香港的本土宵夜文化係點！？講下本地情懷好過

記得那些年青春，大學附近屋村晚上都會出現推木頭車的走鬼檔，有賣即制中式腸粉的推車檔，有賣魚蛋燒賣的車仔，也有即興炒河炒粉雞翅尖的大叔，一班年青人同屋村仔女晚晚行過去幫襯好不熱鬧，回憶也伴隨住電影般的張力和剌激感，因為食環係會偶爾的掃蕩，只見有時行過，大家掃興而回。「今日無開！」腸粉大叔人車平安與否還看明天，當中多少故事多少人情，一對一對年青男女的愛情故事，一個個燈火通明的屋村生活歲月，市井但貼地真實，過時過節更顯熱鬧，甚至發展到極緻還有那一場結局悲傷的回憶「魚蛋革命」。也正正是這種本地特色宵夜文化所衍生的故事，才是屬於香港的深夜食堂。

香港人向來講「搵食姐，犯法啊？」「犯法啊？搵食姐」，本土的宵夜小故事，大多是在法理之間週旋於情和理當中，自從有地產霸權，小食推車流動小販再無生存的空間，連吃串魚蛋燒賣都只能入「7」仔，有無人肯拍出具有本土情懷的宵夜文化，有無人肯向合法和違法之間的小販車仔深入探討，拍一個香港的深夜流動食堂？係犯法就係唔啱的單一思維下，文化自然走向絕望。其實我地唔係唔想有一個進步的社會，但我們只想尋回那個人情味濃熱鬧繁榮的舊香港！

睇到梁家輝《深夜食堂》的票房，真心無興趣理佢仆定直賺定蝕，我只想香港可以有自己的本地宵夜文化，有一個具人情味不偏袒於大地產商場的環境，留小商戶一個營商機會。