籃球世界盃目前已經正在中國進行，其中美國隊繼續成為焦點，雖然佢地陣中已經唔再係粒粒皆星，但始終係由一班NBA球員組成，理論上仍然係今屆世界盃嘅奪標大熱門。不過，美國第一戰面對實力不強嘅捷克只能夠以88:67勝出，令人開始擔心今屆美國隊嘅情況。

而黎到第二戰，美國隊面對嘅係土耳其隊，牌面睇美國隊應該都係可以輕鬆擊敗對手，但結果卻完全係兩回事。美國隊一直與對方拉鋸，沒有辦法拋離對手，其中一個原因係球員們命中率令人失望，特別係領軍人物之一嘅Donovan Mitchell今使12投僅3中，只取得9分。

喺所有球員命中率都低下嘅情況下，土耳其隊成功一路貼住美國隊，最終雙方需要打至加時。進入加時，雙方仍然係咬得好緊，去到最後關鍵時刻，土耳其隊其實本有機會送美國隊一程，但佢地嘅罰球接連射失，反而美國隊並未有放棄，憑住公鹿射手Khris Middleton穩穩罰中兩球，最終美國隊成功反超1分，並保住勝利。

從今仗可以睇到，美國隊一眾球員狀態不穩，完全沒有進入比賽模式，命中率極低，但仍然可以憑住身體質素去稍稍壓制對方。不過，如今佢地面對嘅都係實力較弱嘅球隊，其後進入淘汰賽，佢地要面對嘅將會有法國隊、塞爾維亞、西班牙等勁旅，其中塞爾維亞已經展示今屆要奪冠嘅實力，睇怕美國隊如果再唔上力，今屆實事真係係咁先啦。