唔好睇《蠟筆小新》裡面嘅妮妮個樣得得意意咁，事實上佢並唔係啲咩善男信女，郁啲就鍾意揸住人痛腳要脅同學仔，平時又八八卦卦鬼咁煩……講講下，有冇啲似曾相識，似唔似巴打身邊位女朋友，開頭識佢就好QQ，之後先知瀨晒嘢仲要加埋對方臭脾氣，一嬲又要掟嘢又要打人出氣……OK！衰嘢廢時講咁多，Any肥，如果你女朋友鍾意打你出氣嘅話，得，即刻買個《蠟筆小新》裡面妮妮隻「出氣兔兔」畀佢，起碼出氣時有得順手打下卡，女友心情應該冇跌得咁L差。

「出氣兔兔」係《蠟筆小新》裡面妮妮同佢媽媽成日都打嘅出氣袋，一有咩唔順心，佢哋就會匿埋拎隻「出氣兔兔」出嚟發洩！而呢隻「出氣兔兔」家下終於實體化，日本三英貿易株式会社推出90cm大嘅「出氣兔兔」公仔，佢個樣就好似動畫裡面咁面無表情，條頸就綁咗個可愛嘅橙色蝴蝶結，成個公仔摸落觸感軟綿綿好似麻糬咁，大力打都唔會手痛呀！

目前「出氣兔兔」公仔價錢大約2萬日元，預計9月上旬發售，巴打唔想再做女友出氣袋就要上網買返隻喇！