歐洲國家聯賽尋晚展開四強賽事，由葡萄牙vs瑞士，雙方都為爭入決賽而派出強陣，其中萄萄牙再次征召主力C朗拿度。呢位5屆金球獎得主此前都無參加小組賽賽事，但球隊仍然能夠殺入四強，但黎到重要關頭，作為核心嘅C朗就梗係要幫手啦！

擁有C朗拿度嘅萄萄牙，今仗雖然並未有全面壓制瑞士，甚至對方嘅攻門之數更多，但係C朗強嘅地方就係把握力及效率，機會唔使多，但一個就足以致命。

就喺比賽25分鐘，葡萄牙喺禁區外位置獲得罰球機會，只見主射嘅C朗使用其招牌射法射向遠柱，門將失位下球彈地入網，葡萄牙從而一球領先。

下半場，瑞士獲得比賽嘅主動權，最終喺50多分鐘嘅時候搏得12碼，並由列卡度洛迪古斯主射破網，雙方踢成1比1平手。

成功追平後嘅瑞士，攻勢依然不斷，但始終未能把握機會，相反去到比賽尾段，葡萄牙再由C朗喺禁區加速接應隊長傳球勁射地波入網，葡萄牙再次領先。緊接兩分鐘後，C朗再有個人突破機會，佢使用已經較為罕見嘅插花，成功呃過防守球員，然後右腳射遠柱，門將再一次被C朗收死。

憑住C朗拿度三種唔同嘅入球：罰球、撞射、個人突破，葡萄牙3:1擊敗瑞士殺入決賽，對手將會係荷蘭及英格蘭嘅勝方，面對咁全能狀態咁好嘅C朗拿度，究竟仲有無人可以阻止到佢？