施丹重返皇馬執教，大權在握，買人賣人擁有絕對嘅話事權，有人歡喜但亦都有人愁。其中去年夏天先由車路士轉投皇馬嘅門將高圖爾斯，好有可能成為施丹回歸後嘅第一個犧牲品。

在施丹重新執教皇馬嘅第一場比賽，佢重新起用拿華斯作為正選，而高圖爾斯則只能夠擔任後備。明顯拿華斯就係施丹以往執教時嘅愛將，佢係協助皇馬連續三年奪得歐聯冠軍嘅正選門將，其實力施丹最為清楚。

而高圖爾斯去年夏天以世界盃最佳門將加盟皇馬，隨即搶走拿華斯嘅正選位置，但其表現卻並不是相當突出，所以施丹再次起用拿華斯亦係可以明白的。

當然，施丹表示喺起用邊一位門將作為正選之上仍未有最終決定，而呢個講法亦可以令兩位門將之間增加競爭性，從而引發更佳嘅表現。

不過，其實有消息指皇馬及施丹都仍然對曼聯門神迪基亞有著相當大嘅興趣，特別係迪基亞與曼聯嘅續約問題正處於膠著，而皇馬有意用高圖爾斯與曼聯進行互換，可惜嘅係高圖爾斯對於加盟曼聯並不感興趣。

如果高圖爾斯唔肯加入曼聯，而皇馬又真係想將佢賣掉，咁樣佢好大機會會加盟巴黎聖日耳門，後者因為正選門將保方已經41歲，所以搵定一個年輕又有實力嘅門將事在必行。