《雷朋三世》係日本漫畫家Monkey Punch嘅漫畫作品，於1967年到1969年期間喺雙葉社嘅漫畫雜誌《漫畫ACTION》中連載，後來陸續被改編為動畫、遊戲、小説、真人電影、電視劇、舞台劇等作品。

雖然《雷朋三世》呢套經典作品好多人都已經知道故事內容係講咩，但循例都同大家輕輕講下《雷朋三世》嘅故事大綱︰雷朋三世係怪盜紳士亞森·雷朋嘅孫，被稱為世界最傑出神偷，喺偷嘢前總會發出預告信。佢同拔槍只需0.3秒嘅神槍手次元大介、神秘歐亞混血女盜峰不二子，以及無所不斬嘅居合道高手石川五右衛門合作偷遍全世界。錢形平次嘅後裔，警部錢形幸一一直想要逮捕佢哋，但全部以失敗告終。

當中《雷朋三世》嘅惡女峰不二子更係唔少7、80後心目中嘅性感女神，佢婀娜多姿嘅曼妙身材，當年真係J死唔少男士。而最近《雷朋三世》就宣布系列劇場版新作《峰不二子的謊言》（峰不二子の嘘）將於5月31日號正式上映，同步公開特報影片，呢次故事將會講述神秘歐亞混血女盜「峰不二子」遭遇嘅空前大危機，而且「峰不二子」喺呢次劇場版之中，將會擁有全新造型，非常令人期待！

話說是次劇場版將會由小池健擔任監督、演出以及角色設計，高橋悠也負責劇本，Telecom Animation Film擔綱製作。唔知香港會唔會都有得睇呢套劇場版呢？一齊睇睇特報短片先啦！