自從施丹去年夏天離任後，皇馬今季經歷左大半個失敗嘅賽季，歐聯、國王盃先後出局，聯賽落後巴塞10幾分，四大皆空基本上已成事實。不過就喺歐聯出局後，皇馬主席佩雷斯正式邀請施丹回歸球隊執教，而呢位協助皇馬連續三年奪得歐聯冠軍嘅領隊亦已經答應，球隊看似要重新步入正軌，而收購行動亦逐步展開，其中一個已經展開嘅收購就係車路士球星夏薩特！

據最新嘅消息指，皇馬已經正式向車路士送上收購夏薩特嘅文件，而第一次皇馬開價7000萬鎊。7000萬鎊呢個數字對於車路士嘅目標仲有一段距離，此前車路士曾表態其他球隊要買夏薩特至少需要1億鎊。

當然，皇馬及施丹唔係傻的，佢地都知道今次報價車路士方面一定會拒絕，但佢地嘅意向其實只係想向車路士表示，佢地嘅收購行動已經正式展開。

皇馬方面已經派出代表到倫敦，並將會隨即與車路士嘅代表就收購夏薩特一事進行談判。對於夏薩特，施丹一直都非常希望可以得到佢，而夏薩特本人亦多次表態希望到皇馬踢波，因此預計今次收購成事機會非常大。另外，由於夏薩特與車路士嘅合同將於2020年夏天完結，而佢亦仍然未同車路士續約，所以為免人財兩失，車路士今夏賣走佢係最好嘅時間。

估計擁有3億鎊轉會資金嘅施丹，好可能一黎就會在夏薩特身上拋出1億鎊，而究竟可唔可以平啲完成收購，就要睇皇馬嘅談判代表啦。