經歷左歐聯多場嘅逆轉勝利後，逆轉睇黎真係好似容易發生左好多，就算領先住都唔好咁老定。而尋晚嘅歐霸盃16強賽事，又再一次發生逆轉，而今次嘅主角係阿仙奴。

歐霸16強次回合，阿仙奴重返主場面對雷恩，首回合作客嘅槍手以1：3落敗，形勢並唔樂觀。不過，岩岩一輪英超阿仙奴以2：0擊敗近況出色嘅曼聯，令球隊士氣大增，再加上見證多場逆轉反勝嘅比賽，阿仙奴眾將今場應該並唔會咁易放棄。

果不其然，阿仙奴一開賽就搶攻，一次在右邊嘅攻勢，艾朗藍斯喺禁區接應隊友嘅傳送，並拗腰地波傳中，門前嘅奧巴美揚一撞球應聲破網，短短開賽5分鐘阿仙奴就追翻一球，只要再入一球佢地就可以憑住作客入球優惠晉級。

入左一球嘅阿仙奴之後繼續進攻，並在14分鐘嘅時候發動快速反擊，奧巴美揚左邊路得球後落底，然後施展假腳嘅同時傳比禁區頂嘅藍斯，只見藍斯即時one two將個波彈回底線，呢個時候其實哥拉辛拿斯正處於越位位置，但佢並無意欲拎波，所以球證亦都無吹越位。而就喺呢個時候，奧巴美揚突然起動喺個波出底線前成功傳中，並由後上嘅尼爾斯飛頂破門，憑住呢球阿仙奴兩回合計追成3：3平手，如果維持呢個比數，佢地將會晉級。

不過其實接應藍斯傳球嘅奧巴美揚，當時係有越位嫌疑的，但最終球證並無吹罰。

被攻入兩球後，雷恩終於搶翻多少少攻勢，其中喺下半場開賽初嘅一次組織，如果唔係門柱救番阿仙奴一命，可能成個故事就會唔同。

正所謂大難不死，必有後福，阿仙奴喺71分鐘成功擴大比數，米希達恩將球分向左邊，哥拉辛拿斯喺唔控球嘅情況下直接地波傳中，球成功越過中間嘅後衛及門將，直達最後嘅奧巴美揚腳下，後者輕鬆一撞就成功梅開二度，阿仙奴兩回合計4:3領先。

成功入球後，奧巴美揚更加高興問場邊拎左個黑豹頭套慶祝，呢個動作喺佢仍然效力多蒙特嘅時候已經經常出現。

最終，完場雞聲一響，阿仙奴維持3：0嘅比數，兩回合計4：3反勝雷恩晉身歐霸盃八強！