祖雲達斯尋晚以3:0擊敗薩斯索羅，繼續大幅拋離領先意甲榜首。不過唔好睇佢地好似大勝對手，事實上佢地並無想像中贏得咁輕鬆，而C朗拿度亦疑似喺比賽中對隊友不滿。

憑住基迪拉喺上半場23分鐘嘅入球，祖記率先取得優勢。不過，比賽發展祖記不斷浪費機會，其中基迪拉多次面前失機，令祖記錯失擴大領先優勢。其後，因門將一次出營判斷失誤，祖記更差啲就比對方扳平。

唔知係咪因為不滿基迪拉嘅表現，C朗喺60分鐘一次禁區外起腳，竟然完全唔係射喺龍門，而係直飛旁邊不遠嘅基迪拉頭部，直接將佢爆頭！

理論上C朗呢一腳射門應該係無心的，但佢射門一刻是否面對龍門佢應該會非常清楚，但最終竟然射爆隊友個頭，又真係令人費解。

而唔知係咪被C朗射到暈，基迪拉幾分鐘後就被換出，然後祖記就迎來爆發，C朗及安利簡恩分別喺70及86分鐘各入一球，鎖定勝局。