荷里活將日本動漫或者遊戲改編做真人版電影已經唔係咩新鮮事，繼《龍珠》、《攻殼機動隊》等等之後，前排又話要開拍《洛克人》真人版電影，已經搞到一眾粉絲忐忑不安……呢期又傳出新消息，話荷里活又有新搞作，今次輪到開拍《我的英雄學院》真人版電影，老老實實，真心淆底多過期待呀下！

《我的英雄學院》係由日本漫畫家堀越耕平繪製嘅少年漫畫，講述呢個世界，有五分之四嘅人都有名為「個性」嘅超能力，有人會恃著「個性」作為壞人，亦有人恃著「個性」成為捉拿壞人嘅英雄。而主角綠谷出久係一個冇「個性」嘅少年，但佢仍然憧憬並渴望成為一位英雄，有一次佢意外得到「個性」，並因此進入培育英雄嘅雄英高校就讀。

外國嘅電影頻道最近有新消息，話Legendary Pictures宣佈會拍攝日本動漫《我的英雄學院》，並由Alex Garcia同埋Jay Ashenfelter擔任製作人以及執行後續工作，而日本方面，集英社同東寶都會參與呢次真人版電影，目前官方就未有透露太多詳情，不過好多網民都唔睇好今次製作，認為外國人真係好難拍得出日本動漫嘅味道，巴打們又覺得點？