聯賽盃第三輪曼聯面對英冠球隊打比郡，理應係一場手到拿來嘅比賽，雖然一度早早先開紀錄，但最終要不是費蘭尼補時階段嘅入球，曼聯已經喺法定時間90分鐘內被擊敗，而可惜嘅係結果曼聯仍然喺互射12碼階段以7:8落敗。

可能你會以為摩連奴想放棄聯賽盃所以擺爛，但睇佢派出嘅陣容卻並唔係好似想像中咁，盧卡古、馬迪、連加特等正選球員繼續上陣，而就算唔係常規正選嘅馬達、馬斯亞、艾殊利楊格、拜尼等都係主要輪換球員，所以不敵英冠球隊點都講唔到過去。

落敗唔可怕，令人失望嘅係摩連奴嘅曼聯表現比打比郡更似一支英冠球隊，佢地竟然可以完全唔佔優勢，全場控球率只有可憐的48％，中龍次數亦比打比郡少3次，所以最終出局亦絕對合理。

一場敗仗固然之打擊士氣，但更令人擔心嘅係球隊嘅內憂問題，領隊摩連奴與中場核心普巴嘅矛盾已經升級，其中有消息指摩帥較早前當眾宣佈唔會起用普巴作為球隊隊長，原因係不滿對方態度差，而無份落場踢打比郡嘅普巴，亦被拍得無睇比賽至最後一刻，好似球隊嘅勝負並唔關佢事咁。

作為法國隊奪得世界盃冠軍嘅功臣之一，普巴嘅天賦從來無人懷疑，但係佢喺曼聯嘅表現始終都係唔夠穩定，比人嘅信心亦未足夠。開季至今，喺聯賽當中曼聯只係錄得3勝1和2負嘅戰績，排名第7位，比6戰全勝嘅利物浦已經拋開8分距離，雖然普巴喺聯賽已經攻入2球，但領軍能力令人質疑。

面對內憂外患嘅情況，摩連奴同紅魔都已經被推至風高浪尖嘅位置，究竟摩帥會唔會真係被犧牲呢？還是呢位狂人可以逆轉鎮壓得住班球員呢？

而值得一提嘅係，今場帶領打比郡擊敗曼聯嘅就係車路士名宿林伯特，而林伯特當年就正正係摩連奴嘅愛將，雙方算得上係師徒關係。