「籃球之神」Michael Jordan旗下嘅Jordan Brand眾所周知係專門推出籃球服飾嘅品牌，而其中籃球鞋可以話係佢地最重要嘅收入內源。不過，今日Jordan Brand只有籃球嘅傳統正式打破，因為佢地正式公佈由即日起贊助法甲足球隊巴黎聖日耳門(PSG)，為佢地提供相關嘅服飾。

Jordan Brand將即日起取代Nike成為PSG嘅服飾贊助商，因此球衣上嘅一剔將會改為飛人Jordan著名嘅Logo。實際上，Jordan Brand其實已經與PSG合作了好幾年，但係今次將會係雙方首次合作推出全套波衫，並會喺比賽中歷史性地登場。

對於今次與PSG合作，Jordan本人表示:「Jordan Brand與PSG將會在運動及風格上分享最特有嘅地位，所以與PSG合作係自然嘅選擇。」

過往聽到Jordan Brand基本上都只會諗到籃球，但係如今Jordan Brand首次跨界別進入足球領域，對於品牌黎講絕對係歷史嘅一大步，要知道PSG坐擁兩位世界級球星：尼馬及麥巴比，尼馬貴為巴西隊嘅頭號球星，而麥巴比則係今夏世界盃嘅超新星，係未來金球獎嘅大熱門，佢地將會肩負將Jordan Brand喺足球圈擴張嘅責任，預計未來將會有更多嘅球隊與Jordan Brand合作，屆時飛人Logo將會同時出現喺籃球及足球壇，「籃球之神」嘅版圖則會進一步擴大！