「籃球之神」Michael Jordan可以話係籃球場上接近無敵嘅存在，佢嘅進攻能力絕對係舉世無雙，基本上要阻止佢就只可以好似當年活塞「壞孩子軍團」嘅殺人防守先可以真係阻止到佢。不過，喺Jordan生涯仍然有一位球員可以最大程度上限制呢位「神」，佢就係人稱「手套」嘅超音速傳奇球員Gary Payton。

作為1990年嘅選秀榜眼，Payton被擁有Shawn Kemp嘅超音速選中，並隨即安排正選控衛嘅位置比佢。新秀賽季Payton基本上無乜進攻能力，但係其防守已經展現出黎，場均雖然只有27.4分鐘上陣時間，但就可以交出2次抄截，絕對係非常可觀嘅數字。

其後黎到1995-96球季，呢個球季可以話係Payton防守最巔峰嘅一季，佢場均可以交出2.9次抄截，成為聯盟嘅抄截王，並且連續第三年獲選入年度最佳防守一陣。而相信最令球迷印象深刻嘅，一定係佢喺1996年嘅總決賽入面防守Michael Jordan。

其後黎到1995-96球季，呢個球季可以話係Payton防守最巔峰嘅一季，佢場均可以交出2.9次抄截，成為聯盟嘅抄截王，並且連續第三年獲選入年度最佳防守一陣。而相信最令球迷印象深刻嘅，一定係佢喺1996年嘅總決賽入面防守Michael Jordan。

當年Payton成功協助超音速突破西岸進入總決賽，對手係擁有岩岩回歸NBA第二年嘅Jordan嘅公牛隊。喺總決賽入面，Payton被委以重任，就係全場緊盯住Jordan，呢種緊盯講緊嘅係真係全場完全貼住Jordan，要對方每一次拎球都絕對係面臨住超巨大壓力。

Payton嘅壓迫性防守，就連係Jordan都難以應付，要知道1995-96球季Jordan喺常規賽場均可以交出30.4分，係聯盟嘅得分王，同時佢喺以往咁多年嘅季後賽得分好多時都會比常規賽更高，唔計新秀賽季Jordan最低一年季後賽場均都可以有31.1分。但係當面對Payton嘅呢一年總決賽，Jordan嘅得分就被最大程度減低。

喺頭三場總決賽，Jordan分別取得28分、29分及36分，公牛取得總局數3:0嘅絕對優勢，但喺第四場比賽，Payton傾盡混身解數去防守Jordan，真係差唔多以一人之力去全場緊貼呢位「籃球之神」，無論係繞前防守、偷波，甚至係犯規目的都係要阻止Jordan拎到個波，又或者可以輕鬆出手。

最終，Jordan真係喺第四場及第五場分別只係拎到23分及26分，而呢兩場超音速都成功贏波，從而令總局數追至2:3。可惜嘅係，即使去到第6戰Payton仍然成功防守Jordan，令佢只係拎到22分，但超音速都係不敵公牛，最終失落總冠軍。

Payton嘅防守特點係，出手落點準、速度快，又敢拼搶，只要你稍一唔留神，或唔夠搏命嘅話，佢就可以將你硬生生咁吃掉。而唔單止防守能力，Payton嘅垃圾話都係頂級的，佢可以用說話再你擊垮、去令你失去信心，再配合佢嘅防守能力真係令唔夠實力嘅你越打越打唔過佢。

如今NBA非常著眼進攻，防守球員處處受限制，令唔少防守球員難以發揮自己100%嘅能力，所以相信未來唔會再有好似Payton咁嘅球員，一位真係可以將防守推至極限嘅球員。