雅加達亞運香港隊又傳黎好消息，就係女子游泳隊成功喺4x100混合接力游出4分03.15秒，為港再奪得一面銀牌！不過，其實港隊呢面銀牌可以話黎得相當驚險，因為其實佢地當初只係游出第4名嘅成績！

今場女子4x100混合接力，香港隊喺決賽派出鄭莉梅、歐鎧淳、楊珍美及陳健樂出戰，雖然有力一爭獎牌，但面對日本、中國及韓國三大國，要拎牌並唔容易，隨時會出現只係拎到「梗頸四」嘅情況。

而結果日本隊以壓倒性奪得第一名，其後中國隊及韓國隊分別以第2名及第3名觸池完成，香港隊則只係以第4名完成。不過，奇蹟一刻好快出現，大會宣佈中國隊及韓國隊分別犯規，所以雙雙被判DQ，因此原本第4嘅香港隊即時升至第二名，銀牌就咁到手！另外，本來第5名嘅新加坡則升至第三，因而獲得一面銅牌。

得知由無牌變成銀牌，4名選手都覺得難以置信，其後更開心到喊，而一眾游泳隊成員亦都非常高興，不斷歡呼慶祝。相反，中國及韓國嘅選手則一臉無奈，並難以接受呢個結果。

今次港隊能夠喺亞運接力奪銀，絕對係得來不易，所以一眾隊員，以至香港市民都非常高興，並會為此感到驕傲。