「字母哥」Giannis Antetokounmpo憑住驚人嘅身體天賦，再加上可以打盡5個位置嘅全能表現，目前已經成為公鹿隊嘅絕對核心，同時亦都係NBA嘅超級球星之一，係未來MVP嘅大熱門。

而今年夏天，「字母哥」嘅弟弟Kostas Antetokounmpo成功被76人喺選秀大會上選中，但由於佢喺大學期間表現未見突出，所以最終只能夠以次輪第60順位中選，其後亦隨即被下放至球隊嘅發展聯盟鍛鍊。

不過，其實「字母哥」並唔係只有兩兄弟，佢地一家一共有五兄弟，除左大哥Francis Antetokounmpo係一名足球員之外，其餘四兄弟都係籃球員，二哥Thanasis Antetokounmpo目前就喺希臘聯賽嘅彭拿典奈高斯打緊，此前亦都曾短暫喺NBA停留過，而五弟Alex Antetokounmpo則喺美國高中展現出統治級嘅表現。

Giannis嘅身體天賦，喺其他兄弟身上亦可以見得到，好似Alex身高雖然只有198cm，但係臀展就長達218cm，足足比身高多出20cm，呢個天賦將令佢可以更容易變成一位出色嘅防守者。

睇見4位Antetokounmpo進一步展現自己嘅天賦，相信希臘國家隊應該最開心，因為以佢地嘅實力，相信好大機會可以一拼進入國家隊，甚至一齊打正選，屆時大家可能就會聽到旁述不斷講Antetokounmpo、Antetokounmpo呢個名，真係隨時聽到頭都暈。