相信有留意美國大學籃球嘅球迷都知道，作為全美高中生前三嘅球員：R.J Barrett、Zion Williamson及Cam Reddish今年一齊選擇加入杜克大學，組成可能係NCAA歷史以黎最恐佈嘅大一組合。

Barrett雖然作為去年全美第一高中生，但係風頭明顯無Williamson咁勁，後者甚至已被外界評為明夏NBA選秀大會上嘅狀元。無他嘅，Williamson身體勁爆，身高6呎7吋嘅佢，體重達到285磅，但係其彈力驚人，較早前喺隊內訓練期間上演訓練線起跳入樽，震驚一眾球迷。因此，Williamson基本上已經具備征戰NBA嘅體格，而呢一點係Barrett暫時欠缺的。

Barrett與Williamson同為6呎7吋，但係其體重就只有202磅，未來佢進入NBA後首要一定係加強身體嘅肌肉量，否則則使佢擁有再出色嘅技巧，都難以喺NBA呢班怪物當中生存落去，特別係太瘦弱嘅身體會因為比賽強度過大而容易受傷。

不過，Barrett嘅實力都係無容置疑的，喺日前一場NCAA比賽入面，Barrett就喺上陣35分鐘下，30投12中，三分球8投2中，罰球14罰8中，取得全場最高嘅34分，外加5籃板2助攻2抄截1封阻。另一邊廂嘅Williamson則交出29分13籃板4助攻2封阻2抄截，其中三分球4投3中，比Barrett更加全能，特別係失誤方面，Williamson係1次都無，但Barrett就出現高達5次。

除此之外，Williamson憑住驚人嘅身體質素，多次喺比賽入面上演令人目定口呆嘅動作，其中包括極高點封阻、驚人補樽、坦克上籃等等，甚至對方面對佢使用三夾，但係結果都係阻止唔到佢。

對於Barrett黎講，Williamson雖然係隊友，同時亦都係佢未來嘅宿敵，因為相信進入NBA後佢地好大機會成為一生之敵，但眼見呢友隊友搶盡目光，作為曾經嘅全美第一高中生，佢心入面一定唔好受。不過，相信喺佢兩人嘅配合下，杜克大學今年絕對係NCAA冠軍嘅頂頭大熱門！