頭三位：USJ、東京迪士尼海洋、東京迪士尼樂園

頭三位其實冇咩好講，因為係人都知一定由USJ、東京迪士尼樂園(DisneyLand)同東京迪士尼海洋(Disney Sea)三個大型主題公園包辦，但值得一提嘅三者嘅排名按順序係USJ、Disney Sea、最後先係Disneyland。其中TripAdvior盛讚USJ近年與電影、動漫合作嘅「Cool Japan」期間限定設施吸引大量遊客，以遊戲性(對比迪士尼以氣氛取勝)吸引男女老幼各種遊客。

第四位：和歌山 冒險樂園

首先，位於和歌山嘅冒險樂園同大家認識嘅美國冒險樂園絕對係兩回事，第二雖然樂園中有唔少遊樂設施，但主要賣點係園內各種動物，除咗有中國贈送嘅大熊貓，仲有海豚、企鵝表演等，聽落去同香港嘅海洋公園有幾分相似。但和歌山冒險落園更著重遊客與動物嘅接觸，所以園內有好多機會等你零距離接觸到各種野生動物，就算夜晚都可以參觀「Night Safari」，一家大細都啱玩。

第五位：三重縣 長島溫泉樂園

基本上係一個集機動遊戲、水上樂園、植物園再加溫泉於一身嘅渡假區，附近仲有三井Outlet，簡直係一次過滿足你N個願望。淨係諗到起身Shopping晏晝坐過山車夜晚浸溫泉就已經令人心曠神怡！

第六位：富士急

輕易成為成個list中最Hardcore嘅主題樂園，就算唔計全長900米，行完都要40分鐘、惡名昭著嘅鬼屋「戰慄迷宮」，仲有兩秒內加速到180km嘅過山車、落差70米嘅過山車FUJIYAMA、121度(冇錯，超過垂直)衝向地面嘅過山車Takabisha，適合尋求刺激同挑戰極限嘅大家，但同時亦可能係最難搵到人陪你去嘅主題樂園。

第七位：Tokyo One Piece Tower

位於東京鐵塔之中嘅《One Piece》主題樂園，亦係榜上唯一一個全室內主題樂園，非常適合一到夏天冇冷氣就生存唔到嘅香港人。內裏嘅遊玩設施相當Fans向，或多或少都要睇過下原作先會有更大共鳴。

第八位：台場Mega Web

以汽車為主題嘅主題樂園，位於台場所以大家去睇獨角獸高達時可以順手去埋。當中有展出豐田車廠出產汽車、亦有展出經典汽車，如果你有牌仲可以任選一架豐田汽車於1.3km賽道上行返轉。

第九位：天橋立 View Land

位於宮津市妙見山附近，主要景點係觀賞「日本三景」之一嘅「天龍觀」，園內亦有各種簡單遊樂設施。

第十位：日光江戶村

應該係成個List中最低科技嘅主題樂園，事關佢以400年前嘅江戶為主題，遊客可以穿上浴衣感受江戶時代嘅生活，園內亦有忍者機關迷宮、鬼屋等設施。