尋日皇馬領隊施丹突然召開記者會宣佈離任，唔再做銀河艦隊嘅掌舵人，而佢喺記者會上表示自己嘅下一個目標係世界盃，所以唔少人都覺得施丹已經喺皇馬贏得一切，所以佢覺得係時候離隊，並實現自己下一個目標。不過事實又係咪真係咁簡單呢？

作為球員，施丹已經贏盡一切：世界盃、歐聯、聯賽冠軍等等，而轉職為教練後，佢喺皇馬好快就取得成功，除左成功調配一班巨星，佢更史無前例咁帶領皇馬實現歐聯三連霸嘅偉業。而接下來去以教練身份贏得世界盃，好順理成章咁成為佢下一個目標。

不過外國傳媒卻發現，事實上施丹係因為同皇馬一班大佬意見不合，所以佢最終決定犧牲自己，而唔係聽球會話而犧牲一班同自己同生共死嘅球員。特別係C朗拿度，皇馬方面明顯有意想送走呢位已經33歲嘅功臣，此前有傳佢地想以C朗換尼馬，但係施丹並唔同意。

對於一眾高層嘅要求，施丹都拒絕晒，佢有自己嘅計劃，但係球會並唔同意，所以最終施丹迫於無奈下亦都只可以選擇離隊。而決定離隊後，施丹首先同一班球員宣佈呢個消息，之後再召開記者會對外公佈。

當然，施丹嘅離隊並唔代表C朗拿度一定會繼續留隊，甚至加速C朗想離隊嘅想法，但係可以睇出施丹並唔肯就範嘅性格，佢拒絕迎合高層，佢有自己嘅想法並希望可以執行落去。可惜嘅係，佢如今只可以喺另一個地方去實現自己嘅理念。

施丹離隊後，有唔少下一任嘅領隊人選浮面，其中熱刺嘅普捷天奴係熱門之一，另外已經離開阿仙奴嘅雲加「雲爺爺」亦都係候選之一，仲有利物浦領隊高普亦有機會被挖角。無論皇馬最終領隊係邊個，相信呢支歐聯霸主將迎來變天之日，下屆能否再有如此佳績實在存疑。