{ SKIP }
文:MenClub 波特先生  圖:互聯網
POSTED ON 12 Apr 2018

全場比賽精華

 

經歷左巴塞作客出戰羅馬喺首回合領先4:1嘅絕對優勢下,竟然被對手主場追成兩回合計4:4平手,最後羅馬更憑住作客入球優惠淘汰巴塞。尋晚皇馬主場迎戰祖雲達斯,雖然祖記首回合主場輸0:3,但係都有唔少人期望祖記可以學似羅馬咁逆轉皇馬!

而比賽嘅進程可以話同羅馬個場有異曲同工之妙,祖雲達斯用上同羅馬一樣嘅方式,就係安插一位擁有身高優勢嘅球員,佢就係文素基治,而佢嘅作用喺開賽2分鐘就產生,呢位身高1.9m嘅前鋒喺突襲中頭搥一頂,率先打破皇馬大門,追成1:3嘅佢地只差兩個入球。
雖然比人攻入1球,但皇馬其後嘅攻勢其實都非常具威脅,但卻喺37分鐘再一次走甩文素基治,呢位前鋒接應隊友傳中再次用頭搥頂破拿華斯嘅十指關!球迷們好似再一次睇到羅馬式嘅逆襲啦!
去到下半場,祖記繼續咬緊牙關進攻,而喺60分鐘佢地終於達成今仗嘅目標,中場馬度迪後上插入小禁區接應傳中,雖然拿華斯接到個波,但就被馬度迪撞甩左,後者快腳一篤,個波成功射入網仔,祖記追成3:3平手!
追成平手嘅祖記可以話氣勢如虹,相信個刻皇馬嘅球迷絕對會驚到瀨屎。不過,喺補時階段華斯基斯成功搏得12碼,雖然呢一球12碼極具爭議性,但球證都係維持判決,而對於呢個決定祖記隊長保方難以接受,並且情緒激動咁向球證投訴,最終換黎一面紅牌被驅逐離場。接著,C朗拿度主罰呢球12碼,佢勁射龍門左上角,球應聲破網,C朗攻入決定性嘅一球,最終帶領皇馬兩回合計4:3擊敗祖雲達斯,晉身歐聯4強!
賽後,保方接受訪問時,從後走過嘅C朗亦上前同呢位傳奇門將黎一個擁抱,可見雙方都係惜英雄重英雄嘅人,場面令人感動!
經過尋晚一役,歐聯最終4強亦正式定落黎,除左皇馬之外,分別有羅馬、拜仁以及利物浦,四大聯賽各有一支球隊,呢個情況過去幾年都較為少見。而4強嘅抽籤將會喺黎緊中歐時間4月13日下午1點舉行。
【真係眼鏡】EVANGELION新世紀福音戰士EVA 聯乘眼鏡 你係唔係新世紀福音戰士的忠實狂迷?如果你好喜歡EVA,介紹一款完成度好高的日本EVA合作眼鏡比你,通過想像EVA初號機器和出現在新世紀福音戰士中的二號機製作 ...
hobby
【真係眼鏡】EVANGELION新世紀福音戰士EVA 聯乘眼鏡
12 Dec 2018
遲到但係比賽又交到功課,你覺得有無問題?
hobby
【有天賦就任性?】迪比利遲到問題使唔使解決?
11 Dec 2018