【疾風無敵銀堡壘？】籃球機械人誕生，投籃100％命中！

文：MenClub 波特先生　　圖：互聯網
POSTED ON 19 Mar 2018


唔知大家以前有無睇過一套卡通片叫做《疾風無敵銀堡壘》呢？故事係講述一班機械人參加各種唔同嘅運動比賽，好似足球、籃球、棒球等等。可能你會以為呢套只係卡通，但係現實中機械人已經越黎越先進，而近日日本更有公司製作左一部機械人可以進行投籃，精準度仲要非常非常高！

呢部投籃機械人由為人所認識嘅豐田Toyota公司，利用AI人工智能加上鏡頭等裝備去製作，並命名為Cue。而Toyota旗下有一支日本職業籃球隊Alvark Tokyo，所以佢地更將Cue當成球隊嘅一員，為佢安排左70號球衣。

據報導指，Toyota嘅工程師係受到《男兒當入樽》嘅主角櫻木花道所啟發去製造Cue的，不過其身高達到190cm，比櫻木略高一點。而為左要AI去學習投籃，工程人員比Cue一共練習左超過20萬球，咁樣足足比櫻木一個夏天嘅練習多出10倍！

而為左睇下Cue嘅投射能力，Toyota特別搵左兩名職業球員同佢進行對決，每邊限特10球，睇下邊個入得波多，最終Cue以絕對優勢10命中全中，擊敗合共只命中8球嘅人類對手。

不過，Cue暫時未具備移動嘅能力，所以應該短時間內都好難可以真係落場比賽。值得一提嘅係，今次製作Cue嘅工程人員其實從來無製作機械人嘅經驗，所以能夠達到咁嘅程度實在令人驚訝。