依家「人工智能」越黎越流行，由電話入面嘅Siri、屋企嘅Alexa到各種智能汽車，可以預計AI喺未來只會越黎越盛行，而且會以更多不同面貌協助我哋嘅生活。但如果你有返咁上下年紀，又睇過1968年嘅經典科幻電影《2001: A Space Odyssey》，一講起「人工智能」，你個腦好有可能會出一個有紅點嘅鏡頭——電影中嘅超級人工智慧電腦(兼奸角)「HAL 9000」。而你依家又真係可以喺屋企裝返部黎玩喎。
網上嘅「Master Replicas Group」係一個專門製作及販售《2001: A Space Odyssey》週邊產品嘅團體，而佢哋最新推出嘅就係建基於Amazon Fire HD 平板電腦嘅「HAL 9000人工智能」。當然呢個人工智能係唔會殺死同行嘅科學家，佢最大嘅賣點係能夠以電影中「HAL 9000」嘅聲音，同用家對答電影中嘅經典對白。另外用家亦可以向佢詢問天氣等資料，但就會變返做原生嘅「Alexa」黎回答。據知「Master Replicas Group」目前正同Amazon研究幫Alexa換聲，但就未知是否能成事。
