【真球星】「字母哥」要求公鹿取消售賣飛越Hardaway入樽的Tee

文：MenClub 波特先生　　圖：互聯網
POSTED ON 14 Mar 2018

唔知你地記得幾多今季NBA精彩嘅入樽，但係相信公鹿「字母哥」Giannis Antetokounmpo飛越紐約人Tim Hardaway Jr.嘅入樽絕對係目前今季最佳入樽嘅大熱門。

對於「字母哥」呢個入樽，佢集合左騰空力、距離、力量及畫面，絕對係極具震撼力，因此公鹿上下都愛死呢個入樽。近日，公鹿就為到「字母哥」呢個入樽而推出一款Tee，上面印有「字母哥」泰山壓頂咁喺Hardaway頭上完成入樽。

不過，當「字母哥」得知呢件事之後，立即去搵球隊溝通，佢認為出售呢款Tee唔係一件正確嘅事，因為咁樣係對對方嘅一種侮辱。公鹿聽左「字母哥」嘅意見後，決定即刻將呢件Tee下架，唔再銷售。

而對於呢個驚世入樽，「字母哥」解釋當時嘅佢只係一心想接球並且完成得分，佢根本睇唔到Hardaway正正喺佢跨下，所以佢完全無想侮辱對方嘅諗法。

目前，在「字母哥」嘅帶領下，公鹿暫排名東岸第7，領先第8位嘅熱火半場勝差。