【人性光輝】日本馬拉松跑手松田瑞生讓水給競爭對手！

文：MenClub 波特先生　　圖：互聯網
POSTED ON 31 Jan 2018


唔少人口稱比賽時要有體育精神，但實際上並唔係個個都有，更何況當勝負就擺喺眼前嘅時候，好多人都會完全將體育精神放埋一邊。近期香港運動界最火熱嘅討論相信就係地下籃球聯賽攝腳一事同埋HK100內地跑手搶水事件。


攝腳同埋搶水事件被熱烈討論，係因為當中嘅主角都失去左體育精神，令大部份人都感到難以接受。不過，近日喺日本舉行嘅大阪女子國際馬拉松卻岩岩相反，日本嘅跑手卻體現出人性光輝，向所有人展示咩叫體育精神！

喺賽事進行左大慨1個鐘頭嘅時候，日本跑手安藤友香喺中途補給站意外未能拎到補給品，要知道跑長途賽事中途補給係幾咁重要，如果未能夠獲得呢次補給，安藤友香隨時喺賽事後段會體力不支。而就喺呢個時候，作為直接競爭對手22歲嘅松田瑞生喺自己飲左幾淡補給品後，主動遞上自己嘅補給品比安藤友香，呢個舉動令唔少人相當欣賞，因為佢願意睇體育精神比自己嘅勝利更重要。

松田瑞生能夠作出咁無私嘅行動其實一啲都唔容易，因為呢場賽事關乎佢能唔能夠代表日本參加東京奧運選拔賽嘅資格，佢將自己嘅補給品比對方，代表佢嘅補給減少增加體力不足嘅風險，同時亦都增加對手擊敗自己嘅機會，由自己利益出發去睇其實呢個決定絕對係好多人口中嘅「蠢」。不過當人可以將體育精神放喺第一位，咁松田瑞生嘅做法就係優先嘅做法。

最終，無私嘅松田瑞生以2小時22分44秒首先衝過終點，而被幫助嘅安藤友香則以2小時27分37秒奪得季軍，兩位都成功獲得東京奧運選拔賽嘅參賽資格，絕對係完美嘅結局。