【物輕情義重】巴黎聖日耳門今季可以走到幾遠？

文：MenClub 波特先生　　圖：互聯網
POSTED ON 25 Dec 2017

上季比摩納哥長期壓住以致失落左法甲冠軍，又喺歐聯16強領自4球下，被巴塞隆拿喺次回合絕地反勝出局嘅巴黎聖日耳門，今年夏天大肆擴軍，先以天價2.2億歐元從巴塞簽下巴西球星尼馬，又從聯賽死敵摩納哥簽走18歲新人王麥巴比，從而組成超級鋒線：尼馬、卡雲尼、麥巴比。

憑住超級三箭頭嘅攻力，聖日耳門今季喺聯賽展現壓倒性嘅實力，目前以16勝2和1負戰績排名聯賽榜首，得失球更高達+43，比第2嘅摩納哥多出9分及16球得失球。而入球方便，卡雲尼今季喺聯賽攻入19球，排名射手榜第1位，新加盟嘅尼馬及麥巴比則分別攻入11球(射手榜第5位)及8球(射手榜第8位)。

以咁嘅進攻火力同狀態，相信聖日耳門今季要重奪法甲冠軍應該唔成問題，而相信球隊高層追求嘅亦都唔會只係停留喺聯賽冠軍，佢地最大嘅目標必定係歐聯冠軍。不過喺岩岩嘅歐聯16強抽籤，佢地就正正抽中實力強大嘅衛冕冠軍皇馬，雖然呢支西甲班霸今季喺聯賽表現麻麻，但係喺歐聯則仍然出色，特別係C朗拿度喺分組賽個人轟入9球，高踞歐聯射手榜第1位。因此，聖日耳門要想過到皇馬呢一關殺入8強絕對唔容易，但係對於要挑戰未來金球獎嘅尼馬黎講，呢一關係點都要過到。

不過睇番聖日耳門喺歐聯嘅表現，佢地喺小組賽拎到5勝1負嘅戰績，即使同組有同樣實力強大嘅拜仁，佢地亦憑住出色得多嘅得失球佔據小組首名。值得一提嘅係，聖日耳門喺小組賽一共攻入25球，冠絕今屆32支小組賽球隊，卡雲尼、尼馬同麥巴比，分別攻入6球、6球及4球，人人有波入，令對手往往難以重點看守一名球員。面對今屆歐聯小組賽失左7球嘅皇馬，聖日耳門強大嘅攻力好大機會可以撕破呢支近兩屆歐聯嘅霸主。

另外，今季由巴塞轉投聖日耳門嘅尼馬，心態上已經完全唔同，佢已經係球隊嘅絕對核心，喺球場上嘅自信心亦都不斷增強，佢眼入面嘅目標就只有世界盃冠軍、歐聯冠軍同埋金球獎，所以相信佢絕對可以踢得比以前更有火，以挑戰C朗同美斯嘅球王寶座。

目前，法甲已經進入歇冬期，香港嘅朋友近期亦應該感受到進入冬天嘅寒冷，為左保暖大家又會唔會著到成隻糉咁呢？加拿大羽絨品牌NOBIS近期就同聖日耳門Crossover，推出一款名為「Alpha PSG」嘅全球限量版羽絨，全球只有11個國家或地區有售，而香港就係其中之一。

呢件「Alpha PSG」有兩隻顏色可供選擇，分別係黑色及海軍藍色，而衫上面及內籠亦低調咁印有聖日耳門嘅隊徽，喺保暖嘅同時保持住有型，又可以低調咁支持住自己嘅愛隊，作為聖日耳門球迷嘅你，呢個會唔會係一個唔錯嘅選擇呢？

「Alpha PSG」售價：HK$6,999




銷售點： GO WILD 旗艦店：港島東太古城一期地下069A號舖 (電話：2310 6523)