【東岸大戰】字母哥狂轟40分獨力難支，Irving領塞軍奪3連勝

文：MenClub 波特先生　　圖：互聯網
POSTED ON 05 Dec 2017

今日一場東岸大戰：塞爾特人主場迎戰公鹿，賽事焦點落喺雙方嘅超級球星Kyrie Irving及「字母哥」Giannis Antetokounmpo身上。而兩位超級球星亦都無令球迷們失望，雙雙交出亮眼嘅數據，但係始終主隊塞軍整體戰力更平均，最終呢支目前嘅聯盟一哥以111：100擊敗公鹿，收下三連勝。

塞爾特人自從16連勝斷纜後，其實後來嘅5場比賽都錄得4勝嘅戰績，表現可以話仍然喺聯盟之冠，佢地出色嘅表現背後當然全靠Irving嘅發揮保持出色。另一邊廂嘅「字母哥」，近期表現持續高企，而球隊嘅戰績亦都穩步上揚，所以兩大巨星碰頭就引發出一場精彩嘅比賽。

全場落黎，「字母哥」一人獨力砍下40分，24投14中，罰球14罰12中，外加9籃板4助攻，而射手Khris Middleton及Eric Bledsoe則分別添上19分及18分，但較為令人失望嘅係佢地嘅後備，4名上陣嘅後備兵合共就只係攻入12分。

而塞軍方面，Irving 24投13中，三分球4投2中，罰球5罰4中，交出32分4助攻1籃板2抄截，佢多次突破上籃都可以話精彩絕倫，並且完全撕破公鹿嘅防守。除左Irving，中鋒Al Horford亦交出20分9籃板8助攻1封阻，效率極為出色。後備陣容方面，塞軍5名有份上陣嘅後備一共攻入24分，足足比公鹿多出一倍。

擊敗公鹿後，塞爾特人戰績已經提升至21勝4負，排名全聯盟之冠，比西岸榜首嘅火箭多出3場勝利，而比東岸第2嘅騎士則多出4場勝差。