等咗咁耐，Square Enix旗下RPG大作《勇者鬥惡龍XI 尋覓逝去的時光》繁中版正式開售啦，大家可能已經迫不及待入手準備開始冒險，而今回打爆機嘅勇者，仲有特別嘅神秘獎賞：免費送《勇者鬥惡龍I》。

各位玩家打完晒成隻《勇者鬥惡龍XI 尋覓逝去的時光》繁體中文版後，片尾動畫將會出現一段復活咒文，只要輸入這段神奇嘅復活咒文，就可免費獲得中文版《勇者鬥惡龍I》，輕輕鬆鬆又可以玩多一隻Game。

而今次《勇者鬥惡龍XI 尋覓逝去的時光》繁體中文版實體版早鳥特典就會送「冒險新手套組」，憑代碼可取得道具，包括戰鬥後獲得經驗值增加的美妙背心「幸福背心」、戰鬥後獲得金幣增加的金光閃閃背心「暴發戶背心」，以及回復組合（薬草×3、解毒草×3、魔法小瓶×3）；2017年12月10日前買下載版亦可獲得此特典。

另外，官方亦宣布，《勇者鬥惡龍I》、《勇者鬥惡龍II》及《勇者鬥惡龍III》繁體中文版將陸續於11月24日、12月1日及12月8日推出，售價分別為$43、$61及$99，打完新作又可以翻煲舊作。