未來重生 Cafe Racer Lazareth 「Back to the future」

文：MenClub 魏文青　　
POSTED ON 20 Nov 2017

有冇睇過雲迪素同楊紫瓊主演，爛蕃茄評分得6%(滿分係100%)嘅電影《巴比倫密碼(Babylon A.D.)》？冇都唔緊要，因為真係唔多好睇。會講起呢套戲係因為入面使用嘅改裝電單車都係出自法國Lazareth之手，包括雲迪素於電影最後炒到爛咗嘅主角車。但Lazareth近日就同電影公司回收返呢部Yamaha R1，再將佢改裝成以下呢一部！

由於原車已經炒爛咗，所以今次回收嘅只係車架、引擎。原裝前叉拆出黎用喺第二架車到之後，Lazareth自己設計並製作多一個前懸臂，再接駁另一個來自Triumph嘅後轆作為呢部車嘅前轆。前後一致嘅寬厚車胎令到呢部Yamaha R1睇落有幾分《黑夜之神》蝙蝠電單車嘅影子。車身以全碳纖製作；後避震為讓路予由座位直插向後嘅尾喉而轉為水平放置、LED車尾燈就安裝於尾喉四週，著起之時成個噴射引擎咁款，整架車充滿近未來嘅感覺。

來自電影、再浴火重生限定生產一部咁大把，而且有Lazareth嘅親筆簽名，相信呢部「Back to the future Cafe Racer」應該都價值不菲。