【繼續支持】曹星如宣佈休息大半年專心養傷

文：MenClub 波特先生　　圖：互聯網
POSTED ON 27 Oct 2017

相信唔少香港人喺較早前都有入場睇又或係屋企坐定定睇普星如大戰日本前拳王河野公平嘅拳擊賽事，最終賽事因Rex左眼受傷被迫腰斬，而佢喺7個回合入面憑住點數成功擊敗對手，實現22連勝！雖然獲勝，但星如左眼嘅傷勢都可以話幾嚴重，因此佢尋晚宣佈需要全面養傷大半年，並且會停止所有訓練、比賽及拍攝。

喺同河野公平嘅比賽入面，星如被對方嘅頭部撞中左眼位置，其後好快就腫到成隻雞蛋咁大，到最後佢隻左眼甚至完全掙唔大。除左腫之外，星如喺比賽之後亦都有講過其實佢左眼係非常之痛，但為左勝利先死忍繼續作賽。

而除左今次同河野公平比賽時嘅受傷，星如亦有指喺今年3月對另一日本拳手向井寬史後，其右眼亦出現視力模糊情況，但無咩其他野可以做到，只可以等。但係由於10月先對河野公平，所以星如喺6月眼睛未完全康復下開始展開訓練。

如今完成比賽後，星如終於有時間停落黎，真係比時間去休養，特別係佢兩隻眼都有傷，一定要好好檢查清楚及休息，以最佳狀態喺未來再次走上擂台延續勝利。