【新時代】Jordan及Kobe後，Curry將成NBA代表人物？

文：MenClub 波特先生　　圖：互聯網
POSTED ON 03 Oct 2017

對於唔少球迷黎講，「籃球之神」Michael Jordan係90年代球迷們嘅絕對偶像，係NBA嘅代表球員。而喺Jordan之後，雖然有唔少球星相繼掘起，好似Allen Iverson、Tracy McGrady、Vince Carter、Tim Duncan等等，但係講到受歡迎程度最勁嘅始終都係Kobe Bryant，佢可以話喺後Jordan時代NBA嘅代表人物。不過，就算Kobe點強都好，佢喺去年都選擇退落黎，NBA再一次失去佢嘅代表人物，咁究竟邊個有資格接Kobe棒成為新一代NBA代表人物呢？

要想成為NBA代表人物，當然履歷要有番咁上下，總冠軍、MVP、總決賽MVP、球隊戰績等都係考慮因素，而就目前黎睇可以成為NBA嘅代表人物選擇並唔多，其中以下兩位球員將係大熱門，佢地分別係LeBron James同Stephen Curry。

LeBron曾帶隊奪得3次NBA總冠軍，個人又3次成為總決賽MVP以及4次成為常規賽MVP，並連續13年入選全明星陣容，再加上各項個人數據排名NBA歷史高位，毫無疑問佢係現今「NBA第一人」。不過LeBron已經32歲，開始步入球員生涯晚期，狀態好大機會向下滑，再加上佢曾經離開騎士轉投熱火，個人聲譽並唔理想，所以應該有唔少人反對LeBron成為NBA嘅代表人物。

而Curry則喺近年爆出，憑住出色嘅射術為籃球帶起一股三分球熱潮，佢亦先後喺2015及2016年成為常規賽MVP，並帶領勇士連續三年(2015-2017)殺入總決賽，其中更喺2015及2017年協助球隊勇奪總冠軍。而個人數據方面，Curry喺三分球可以話獨領風騷，平均一季可以射入300-400球三分球，基本上三分球嘅紀錄差唔多都要全數落入Curry袋中，就算係傳奇術手Ray Allen嘅總三分球命中數雖然領先Curry多達1000球，但相信唔使幾耐Curry就可以打破呢個紀錄。同LeBron James一樣，外界亦都有唔少人唔鍾意Curry，因為佢地認為不斷投射三分球係嚴重影響NBA嘅可觀性。

對於「後Kobe時代」NBA代表人物呢個問題，Curry亦有自己嘅見解，佢近日接受訪問時表示：「宜家呢個世代睇比賽嘅年輕人，已經開始忘記Jordan，甚至有啲更年輕嘅亦唔太認識球場上嘅Kobe。現在喺時候我要做好自己，並且喺場上傾盡全力。而喺場外，我亦希望可以去激勵更多嘅年輕人，就好似當年我細個被前輩前激勵一樣，並且希望佢地會以我為目標，會想成為我一樣的球員。」

其實Curry呢番言論都絕對唔係講笑，因為宜家嘅年輕人都係睇住Curry呢一代球員長大的，而作為MVP嘅Curry成為年輕人嘅學習對象亦相當合理，而你亦可以睇到唔少年輕人嘅打法已經越黎越似Curry，佢地會喺比賽期間不斷投射三分球。

另外，Curry形象一向相當健康，同家人關係良好，又係一名好父親，再加上Curry所在嘅勇士實力傲視全聯盟，未來數年統治NBA亦絕非不可能，因此「後Kobe時代」嘅NBA代表人物理應歸到Stephen Curry身上。