【注意！】「拗柴」切忌掉以輕心，否則後患無窮

文：MenClub 波特先生　　圖：互聯網
POSTED ON 26 Jan 2018

做運動可以話係一把雙刃劍，適當嘅運動可以令你身體更強壯更健康，但係做運動同時亦帶有受傷嘅風險，其中「拗柴」可以話係做運動時一種最經常出現嘅受傷。雖然「拗柴」好常見，可能抖1-2個星期已經無咩事，但係如果你睇輕嘅話可能會後患無窮。

「拗柴」亦即係腳踝扭傷，通常都會出現喺一啲需要不斷變向或起跳嘅運動，當中就以籃球及足球最常出現。相信唔少朋友都應該試過「拗柴」嘅痛，最容易出現嘅就係當跳起落地嘅時候，踩落一啲突起嘅野，好似對方嘅腳面或凹凸不平嘅場地，當場你就痛到跌落地下，捉實自己受傷嘅腳，然後個人會不斷標冷汗，要好幾分鐘先可以平靜落黎，然後再去睇跌打。例子就好似2017年NBA季後賽馬刺vs勇士嘅第一戰，Kawhi Leonard出手後不幸踩落Zaza Pachulia的腳面，最終出現嚴重扭傷。

較輕微嘅「拗柴」可能好快可以消腫唔痛，但係較嚴重嘅就真係唔可以掉以輕心啦。嚴重嘅拗柴你可能會去睇跌打，又或者去照X光，以防出現骨折，如無骨折大多數人都會慢慢等紅腫消退，然後見無咩痛就覺得已經完全好番。不過，其實無骨折唔代表病情輕微，因為韌帶扭傷，X光係照唔到的，所以掉以輕心將可能帶黎嚴重後果。

最容易出現嘅情況係，你唔知韌帶已經受損，然後你當消腫後就繼續去跑步、去跳，咁樣只會令韌帶傷上加傷，好容易會出現第二次嘅扭傷。重複令腳踝受傷，好可能會導致關節鬆弛、移位，更甚可能會出現變形，腳踝可能會持續出現疼痛，嚴重嘅未來可能會影響日常走路嘅情況。

如果唔想情況惡化，當你「拗柴」之後就一定要留意，好好等待受傷位置痊癒，如果之後再出現「拗柴」就要細心留意下會唔會係自己某一啲動作錯誤或過度使用腳踝。另外，適當強化腳踝肌肉將可以減少再次受傷嘅機會，以下影片嘅動作將可以有效加強腳踝肌肉。