【自動綁帶】全新紅剔「HyperAdapt 1.0」即將登場！

POSTED ON 24 Aug 2017


大部份波鞋主要都係以綁鞋帶方式去繫穩，但係綁得鞋帶就預左佢會甩，呢個亦都係佢嘅缺點之一，而呢個缺點對於運動比賽黎講絕對係致命性的，就好似籃球比賽期間你甩鞋帶將大大影響你嘅跑動，甚至會因此而受傷。

不過科技日新月異，好似波鞋咁亦都跟隨科技進步，其中如果你無非常緊貼波鞋情報嘅話，你可能唔知Nike喺去年12月嘅時候已經推出一款自動綁鞋帶嘅波鞋「HyperAdapt 1.0」，只要你將腳穿入鞋入面，佢就會自動按住你腳嘅大小綁緊鞋帶。

而「HyperAdapt 1.0」喺9年月亦將會推出全新配色，就係鞋面上嘅一剔變成紅色，令波鞋變得更加搶眼。作為當家代言人之一，皇馬球星C朗拿度已經率先穿起呢對新配色「HyperAdapt 1.0」。

呢款新配色「HyperAdapt 1.0」將會喺今年9月陸續喺唔同國家上架，首先係中國，然後到日本同英國倫敦，再之後到德國柏林、意大利米蘭同法國巴黎。雖然今次推出嘅只係新配色，但係對於未買嘅朋友黎講將會多左一個選擇。

另外，有左呢款自動綁鞋帶嘅波鞋，對於運動員黎講絕對係有好處，因為呢款鞋將會自動調節鞋帶嘅鬆緊度，特別係當你運動期間腳有可能會啲腫嘅時候，咁樣呢對鞋就會自動幫你維持喺最適合嘅程度，將可能會為你嘅腳掌帶黎意想唔到嘅好處。