【相隔3年】「泥地王」拿度即將重返世界第一！

文：MenClub 波特先生　　圖：互聯網
POSTED ON 18 Aug 2017


今年網球壇可謂刮起一股老將風，因為兩位前世界一哥費達拿同拿度強勢回歸，其中「瑞士天王」相隔5年後再度奪得大滿貫冠軍，並且一拎就拎到澳網同溫布頓兩項冠軍，氣勢一時無兩。而「泥地王」拿度今年亦克服傷患，相隔3年後再次奪得法網冠軍，成為呢項實事史上首位十冠王。

就喺兩位前一哥狀態爆燈下，佢地嘅世界排名已經再次佔據世界第二(拿度)及第三(費達拿)，並且積分上已經緊追目前一哥英國嘅梅利。而岩岩完成嘅羅渣士盃入面，36歲嘅費達拿雖然成功殺入決賽，但就不敵比佢年輕16年嘅德國天才球手施華利夫失落錦標，而31歲嘅拿度就更加喺16強就爆冷出局。雖然兩位球手都未能奪得錦標，但係積分上佢地已經進一步拉近同梅利嘅距離。

本來，費達拿如果喺羅渣士盃能夠奪冠嘅話，佢將好大機會可以同拿度一爭年度世界一哥寶座，但可惜事與願違，再加上佢賽後宣佈因背傷將唔會參加黎緊嘅辛辛那提網球賽，所以積分上將難以追上拿度。拿度方面，由於佢同梅利目前嘅積分分差只有195分，而梅利將繼續因傷唔會參加辛辛那提網球賽，因此拿度預計將可以喺呢項賽事入面超過梅利重登男子單打一哥寶座。

拿度自從2014年6月底失落世界一哥寶座之後，曾因傷休養左一段長時間世界排名曾跌出前五，但之後慢慢克服傷患，今年不斷累積積分，從排名前五以外一路殺上去前三位置，最終憑住穩定嘅表現成功壓過費達拿，並且超過休戰嘅一哥梅利，即將重返世界第一。

雖然即將重返世界第一，但係拿度要悍衛呢個寶座並唔容易，特別係費達拿將會係佢黎緊最大嘅敵人。今次費達拿退出辛辛那堤網球賽，明顯係為左休養以及保留體力為8月底舉行嘅美網備戰，屆時如果拿度唔可以阻止費達拿奪冠，咁樣雙方嘅世界第一之爭將會變得更加精彩！