【神與No.2】NBA最強組合19年後再次成為隊友！

文：MenClub Mr.波特　　圖：互聯網
POSTED ON 02 Aug 2017


相信如果要選出NBA歷史最強二人組嘅話，公牛歷史組合Michael Jordan與Scottie Pippen絕對係最熱門嘅組合之一，要知道佢地兩個分別貴為「籃球之神」以及「天下第二人」，喺佢地嘅帶領下公牛取得6次NBA總冠軍，並且兩度完成三連冠，成就絕對係NBA歷史級別的，而Jordan就更加被認定為NBA歷史第一人。

不過Jordan同Pippen以上呢啲事蹟講緊嘅已經係20年前嘅事啦，佢地兩位如今都退左休有一段時間，年紀都超過50歲。而可能唔講你唔知，當1998年Jordan帶領公牛拎到第6次總冠軍，並第二次宣佈退休之後，佢就再無同Pippen呢位好拍檔同場以隊友身份比賽。

一眨眼19年過去，近日Jordan喺美國加州舉行Michael Jordan籃球訓練營「飛人學校」，乘住「籃球之神」嘅名，呢個訓練營一早已經滿晒。而就喺一節訓練當中，Jordan在現場指導一眾年輕球員，突然佢邀請另一位重量級嘉賓進場，佢就係Jordan嘅好兄弟Pippen啦。只見Pippen雖然已經51歲，但係佢嘅身型仍然非常標準，甚至比Jordan保持得更好。

而黎到現場嘅Pippen當然唔會只係行行企企啦，佢同Jordan聯手同幾對年輕球員比試投籃。今次Jordan同Pippen聯手，一隔就隔左19年，喺呢段時間入面無論喺NBA賽事定係任何熱身賽、友誼賽等，兩位傳奇都無再試過組隊比賽，因此今次絕對係一個值得紀念嘅時刻。

面對小孩組合，Jordan同Pippen亦完全無留手，只見兩位傳奇嘅投籃技術仍然保持得非常好，特別係Jordan「神」真係「神」，可以見到佢嘅投籃仍然係幾咁柔幾咁準，小朋友雖然好努力但當然又點會夠兩位傳奇射呢？

不過，之後面對年紀較大嘅組合，可能因為體能問題，Jordan同Pippen嘅準繩開始下降，但係由於對決都只係玩票性質，所以勝負並唔係最重要，佢地更看重小孩從訓練中學到啲咩。

今次Pippen現身絕對係Jordan邀請的，而呢次過後真係唔知要隔幾耐先可以再睇到兩位傳奇同場獻技了。

1998年Jordan成功為公牛奪得第6次NBA總冠軍，其後Jordan宣佈第二次退役，公牛奪冠陣容亦同時宣佈解散，Pippen轉投火箭，Dennis Rodman轉投湖人，Steve Kerr則轉投馬刺。雖然後來Jordan喺2001年決定回歸NBA，但係佢加入嘅卻係巫師，而個個時候Pippen已經轉投左去拓荒者。最終，Jordan喺2003年最後一次退役，而Pippen則喺2003年回歸公牛再打一年，之後喺2004年亦都正式離開NBA。