一代壞孩子卡斯辛奴宣佈退役！

文：MenClub Mr.波特　　圖：互聯網
POSTED ON 26 Jul 2017


卡斯辛奴呢位球員，相信喺唔少球迷心目中都係天使與魔鬼嘅混合體，因為佢係一名足球天才，但同時性格亦有缺憾，所以執教佢嘅教練都對佢又愛又恨。不過，呢位曾經嘅不世天才近日就宣佈結束球員生涯，現年35歲嘅佢將會正式掛靴。

其實今次卡斯辛奴掛靴一事，絕對係非常突然，而又令人意想唔到的，因為佢係今年7月頭嘅時候都仲講緊簽約意甲球隊維羅納，但係估唔到一個星期之後佢突然宣佈退役，之後幾個鐘頭後佢又宣佈取消退役。正當所有人都被佢搞到唔清唔楚嘅時候，佢又再次喺網上宣佈自己真係退役。

最終卡斯辛奴今次係咪真係退役真係好難捉摸，真係話唔埋隔多幾日佢又會跳出黎話都係繼續踢波啦。只可以講黎到宜家呢一刻，呢位意大利前鋒都未再次反口，咁樣我地亦只可以覺得佢今次係真係退役啦。

卡斯辛奴自1999年正式展開職業球員生涯，至今已經18年時間，期間佢曾經效力多家球會，其中包括母會巴里、羅馬、皇馬、森多利亞、AC米蘭、國際米蘭、帕爾馬，同埋未曾上過陣嘅維羅納。而當中最令人印象深刻嘅，相信就係效力羅馬嘅時候，佢一共喺呢支首都球隊踢左4個球季多一啲，係佢生涯效力一支球隊最長嘅時間，期間佢一共上陣左161場攻入52球，而佢同羅馬王子托迪嘅組合亦令唔少人非常回味。

不過，效力羅馬期間卡斯辛奴並未能為球隊帶黎太多錦標，其中就只有2001年嘅意大利超級盃。而除左為羅馬帶黎意大利超級盃之外，卡斯辛奴亦曾為皇馬拎過1次西甲冠軍、為AC米蘭拎過1次意界冠軍同1次意大利超級盃冠軍。而個人獎項方面，卡斯辛奴曾分別喺2001年及2003年當選意甲最佳年輕球員。

喺球場上，作為前鋒嘅卡斯辛奴可以出任前鋒線上任何一個位置，無論係翼鋒、中鋒定係輔鋒，佢比賽期間總係充滿創造力，而憑住出色嘅視野佢嘅助攻能力絕對唔比入球能力為低，所以有睇佢比賽嘅球迷都見證過佢唔少精彩嘅傳送。

雖然個人能力出眾，但係卡斯辛奴嘅球員操守無論場上場下都經常被批評，咁樣令佢喺比賽期間經常拎到不必要嘅犯規、黃牌甚至紅牌。除此之外，卡斯辛奴由於年少成名，所以性格驕橫跋扈，目中無人，經常同教練互相開火，所以無乜幾多教練頂得佢順。而係生涯後半段，卡斯辛奴嘅生活開始唔夠紀律身型開始走樣，就係咁佢嘅速度、靈活性同體能都大幅下降，間接導致佢宜家35歲就要退役。

如今一代壞孩子退役，球場上出現呢類型性格球員嘅機會亦變得越黎越少，唔知你會係欣賞佢定係覺得佢不可一世呢？