【係愛呀哈利】塞爾特人重簽「真理」，助佢完美退役

文：MenClub Mr.波特　　圖：互聯網
POSTED ON 19 Jul 2017


NBA著名小前鋒「真理」Paul Pierce喺岩岩一季賽事結束前已經率先表態，指自己將於賽季完結後正式退役。不過對於唔少球迷黎講，當時宣佈退役嘅PP等同將會喺快艇結束球員生涯，咁樣好似總係差咁啲野咁。

不過，由於快艇主教練Doc Rivers同PP關係密切，咁當然知道呢位愛將個心諗緊咩。最終，快艇喺6月底嘅時候將PP裁走，令佢成為一名自由球員。而就喺美國時間7月12日，塞爾特人同PP簽下一份象徵式嘅合同，令佢重新成為塞軍嘅球員，咁樣佢就名正言順以塞爾特人球員身份退役，結束19年嘅球員生涯。

可以睇到以下就係PP嘅簽約過程，佢全程都開心到笑唔停，之後又再次喺塞爾特人嘅訓練場練下習射下波，各位球迷係咪咩回憶都番晒黎先？！不過，呢一次亦都同時係PP球員生涯最後一次練習啦，因為佢練埋呢次之後就會正式退役，脫下球員身份。

Paul Pierce喺1998年選秀大會上被塞爾特人以首輪第10位選中，其後成為球隊嘅基石，多年來一直為球隊打拼，成為塞爾特人近代嘅第一代表，繼承左塞爾特人個種鐵血精神。不過，PP喺塞爾特人生涯上半段並唔係一凡風順，其個人表現雖然保持強勢，但始終喺季後賽都係行得唔遠，甚至2006及2007年更加失去季後賽資格，導致塞軍有過放棄PP嘅想法。

不過，最終塞軍決定留住呢位球隊核心，並且喺2007年夏天成功引入Kevin Garnett及Ray Allen兩位巨星，組成塞軍三巨頭。憑住三位球星超強嘅實力，同年塞爾特人就成功奪得總冠軍，而作為球隊基石嘅PP亦毫無懸念咁成為總決賽MVP。要知道呢個總冠軍對於塞爾特人有幾重要，因為作為NBA歷史上奪得最多總冠軍嘅球隊，呢一次總冠軍足足相隔左22年。

可惜嘅係，呢個三巨頭組合並唔能夠為塞爾特人帶黎第二次總冠軍，所以最終球隊選擇喺2013年夏天將PP同KG一同送到籃網，以換黎未來選秀權，銳意進行重建。對於離開塞爾特人PP有十萬個唔願意，但係佢知道球隊已經起左送走佢嘅念頭，佢亦唔想令自己同球隊關係破裂，再加上當時加入籃網將擁有挑戰總冠軍嘅陣容，所以佢亦接受塞軍嘅決定，離開效力15個球季嘅母會。離開塞軍後，PP除左效力過籃網之外，仲曾經加入巫師以及快艇，期間亦曾有唔少神來之筆，但係就已經再唔係以往個個場上嘅進攻百科。

Paul Pierce在效力塞軍期間，一共為球隊上陣1102場比賽，場均可以取得21.8分5.6籃板3.5助攻，另外佢亦曾10次成為全明星，1次入選年度最佳二陣，3次入選最佳三陣。而未來，塞爾特人必定會為Paul Pierce舉行其34號球衣退役儀式，歷史最輝煌嘅球隊將又多一個球衣號碼唔用得啦。