【新球員介紹】AC米蘭新罰球王 - 哈根·查蘭洛古

文：MenClub Mr.波特　　圖：互聯網
POSTED ON 11 Jul 2017


喺香港相信大部份球迷都鍾意睇英超，因為呢個聯賽喺世界上最激烈嘅足球聯賽，比賽速度高，球員身體接觸又多，所以正常都係吸引啲。不過其實除左英超，其實香港都仲有唔少AC米蘭嘅球迷，呢班球迷較具資歷嘅可能由荷蘭三劍俠開始睇起，之後加入嘅球迷就係見證千禧年後嘅盛世，亦即係黃金中場嘅年代。再之後，意甲因財政問題間接令AC米蘭亦陷入財困，被迫以租借球員度日，咁嘅情況下令球隊跌入近30年嘅低谷。不過，黎到今個夏天一切都唔同晒，因為AC米蘭喺今年4月被包括香港商人李勇鴻在內嘅財團正式接管，所以佢地背後擁有一支大水喉照住，出手買人非常果斷，至今已經買左8位新球員，動用資金超過1億歐元！

作為AC米蘭球迷，相信睇到今夏球隊買人嘅情況一定非常感觸，因為球隊已經好耐無試過咁樣買人，球隊實力預計將會大幅得到提升，重捨昔日歐洲豪門身份絕對不是夢。而其中我Mr.波特好想介紹其中一位今夏新加盟米蘭嘅球員，佢就係黎自德甲球隊利華古遜嘅中場哈根·查蘭洛古(Hakan Çalhanoğlu)。

睇到呢位球員個名入面有哈根，係咪令你諗起一位球員呢？無錯啦佢就係土耳其傳奇前鋒哈根蘇古。同樣，哈根·查蘭洛古係一名土耳其球員，佢現年只有23歲，司職進攻中場。據報導指，米蘭今夏以大慨2000萬歐元(最高2400萬歐元)將查蘭洛古簽下，呢個價錢放係今日嘅足球市場，其實真係不值一提，因為睇下好似當皇馬以4600萬歐元簽左一位只有16歲嘅球員、18歲嘅麥巴比身價又超過1億歐元時，查蘭洛古嘅身價就顯得好平庸。

不過事實又係咪咁呢？身價真係可以完全反映球員嘅實力嗎？睇完以下嘅影片，相信你會對呢位球員眼前一亮，因為佢真係一名非常出色嘅球員。

睇完佢嘅影片，你應該都會發覺，無錯佢係一名罰球專家，年紀輕輕嘅佢對罰球駕輕就熟，係咪搵得番米蘭以前罰球大師派路嘅味道呢？佢嘅罰球唔單只準精，仲要勁度十足，就算係中場附近位置佢都有機會可以將個波送入網，實在係唔容易。而睇番數據，原來佢係自2013-14球季以黎，喺五大聯賽入面射入最多罰球嘅球員。

除左罰球特別出色之外，查蘭洛古其實係一名全能型中場，無論係傳球、控球，抑或係防守亦都屬於中上，特別係佢嘅護球能力，都有少少前巴塞中場沙維嘅影子。

上季效力利華古遜期間，查蘭洛古因為喺2011年背棄加盟土超球隊特拉布宗嘅協議，最終被國際足協罰喺今年2至5月期間停賽，所以佢喺岩岩一季只為球隊上陣左22場比賽攻入7球。

成功得到查蘭洛古嘅加盟之後，預計佢將會好大機會成為球隊嘅正選進攻中場，咁樣睇黎同位置嘅日本中場本田圭佑將好大機會好似佢自己咁講喺今夏離隊。

除左能夠大手買人外，仲可以引入咁具天賦嘅球員，AC米蘭今次真係有望重拾強隊嘅身份，作為佢地球迷嘅你係咪已經相當期待呢！？