好，又有好多生字要學啦！首先所謂「役者繪」其實係「浮世繪」嘅一種，不過就專指以歌舞伎演員、舞台、觀眾等相關人事物嘅作品。而當中最出名嘅一位畫家，就係只曾於寬政6至7年(1794~1795)間十個月創作出超過140幅高水平作品嘅神秘畫家「東洲齋寫樂」，近年就指佢係阿波蜂須賀家的能劇演員 - 齋藤十郎兵衛。

而「寫樂」咁多幅作品中，就有一幅名為「三世大谷鬼次の奴江戸兵衛」。「大谷鬼次」係一個代代相傳嘅歌舞伎演員名，「三世」即係第三代」，「奴江戸兵衛」其實係歌舞伎劇目《恋女房染分手綱》嘅其中一個角色。成句加埋就即係「由第三代大谷鬼次飾演嘅奴江戸兵衛」。