【空中霸王】足球界飛人 - C朗拿度

文：MenClub Mr.波特　　圖：互聯網
POSTED ON 07 Jul 2017


對於唔少人嘅第一印象黎講，跳得高嘅人就應該去打籃球，踢足球好似就唔需要有非常驚人嘅彈跳力，唔知你本身又係咪咁諗呢？而要你講出目前現役球員入面邊位球員嘅彈跳力最好，你會諗起邊個呢？我Mr.波特就會諗住皇馬球星C朗拿度啦。

C朗貴為現役世界最偉大球星之一，佢可能無美斯個種天賦，但係佢憑住努力，成功練就一身銅皮鐵骨，完美嘅運動員身驅配以最強大嘅運動能力，處於身體巔鋒期嘅C朗可以堪稱足球場上嘅體能怪物。

相信唔少球迷都叫識過C朗嘅彈跳力，佢嘅垂直彈跳高度喺比賽入面令人目定口呆，佢可以喺有助跑嘅情況下可以跳至膝頭哥撞到佢嘅隊友賓施馬，要知道呢位法國射手嘅身高都有成1.87m，所以可以想像本身1.85m高嘅C朗可以跳到有幾高！

喺2013年2月皇馬對曼聯嘅一場比賽入面，C朗就曾經以頭搥喺前曼聯隊友艾夫拿頭上攻入一記精彩入球，而令人開始意識到C朗嘅彈跳力究竟有幾恐佈。

以上講嘅入球情況係咁嘅：C朗跳起後佢頭頂嘅最高點離地足足2.93m，而雙腳離地則達到0.78m(30.7吋)，而要知道呢個彈跳高度已經比一半嘅NBA球員跳得更加高。作為參考，話埋比你知，其實足球龍門框嘅橫眉亦都只係2.44m高，而籃球架嘅籃框高度亦都只係3.05m。所以，C朗呢種彈跳力基本上已經達到NBA級別，相信佢要入樽亦都完全無難度。而將呢種彈跳力放到足球上，特別係頭搥方面，根本喺空中就無乜邊個可以同他對頂。

另外，喺2016年歐國盃，C朗亦曾憑住一次高人一等嘅頭搥成功破網，助葡萄牙喺歐國盃4強擊敗威爾斯，成功打入賽事決賽，呢個入球亦繼績證明當時31歲嘅C朗嘅彈跳力依然驚人！

其實頭搥喺足球世界真係一種非常重要嘅得分武器，而歷史上亦有唔少空中霸王，其中好似杜奧巴、比亞荷夫、高路斯、奇連士文、卡希爾等等，佢地都非常擅長以頭搥黎得分，而如今C朗亦憑著出色嘅彈跳力成為現役「空中霸王」嘅代表了。