【失意天才】一代天才前鋒保贊外流被用廢？

文：MenClub Mr.波特　　圖：互聯網
POSTED ON 22 Jun 2017


巴塞隆拿係一個出過無數天才球員嘅地方，好似美斯、恩尼斯達、沙維、布斯基斯等，而仲有一位前線球員曾經被認為天賦拍得住美斯嘅，佢就係保贊啦，唔知你仲記唔記得佢呢？

現年26歲作為巴塞青訓產品嘅保贊，早喺2011年已經離開球隊，期間曾轉戰意甲、荷甲、英超以及德甲，而現時則效力英超嘅史篤城。而由於史篤城一向習慣打長傳及高空攻勢，所以身高只有1.7m嘅保贊根本無用武之地，即使球隊曾嘗試轉打地面流攻勢，令保贊可以踢出好表現，但最終球隊都係選擇用番佢地最擅長嘅高空轟炸。

由於知道自己喺史篤城應該都無咩上陣嘅機會，所以即使自己嘅合同至2020年先會完結，但係保贊亦希望可以同教練曉士坐低傾傾，如果球隊認為佢再唔適合球隊，佢都希望可以離隊轉到佢有機會表現自己嘅球隊，其中佢最想重返西甲，而佢自己亦透露有唔少球隊都對佢有意思，包括：維拉利爾、皇蘇、西維爾等等。

保贊喺2007年以17歲為巴塞一線隊首次上陣，之後佢亦經常以後備身份為球隊取得入球，係美斯嘅有力替補。喺巴塞生涯一共上陣163場比賽攻入41球，期間獲得三座西甲冠軍、兩次歐聯冠軍、1次國王盃等。

不過2011年7月，保贊卻以1200萬歐元被賣至羅馬，自此狀態便開治下滑，再沒有達到過喺巴塞時嘅表現。雖然宜家喺史篤城陷於邊緣人嘅境地，但係保贊並唔打算放棄，佢表示自己會全力爭取上陣嘅機會，為到能夠穿起呢支球隊嘅球衣比賽而努力。

其實要能夠達到美斯嘅高度真係一啲都唔簡單，就算你好似有佢嘅天賦，但係你無佢嘅機會同埋佢嘅際遇，真係再多嘅天賦都只會浪費。如今保贊就係咁，曾被認為喺美斯嘅接班人，但最終落得只能夠長居後備，實在令人非常可惜。