【旋風襲港】曼聯中場普巴訪港，現場球迷瘋狂！

文：MenClub Mr.波特　　圖：互聯網
POSTED ON 20 Jun 2017


近日足球史上最高轉會費紀錄保持者曼聯中場普巴進行亞洲之旅，先前已經到過北京、上海及廣洲進行宣傳活動，而尋日呢位曼聯紅人亦首次黎到香港，同一班粉絲會面兼且舉行簽名會。除此之外，普巴亦作為「adidas 1v1 Cage Challenge」嘅特別嘉賓，現場觀看賽事嘅決賽，並擔任頒獎嘉賓，為冠軍送上禮物。

普巴一出場已經引來全場哄動，而作為特別嘉賓嘅佢，見證住「adidas 1v1 Cage Challenge」嘅冠軍誕生。賽事最後兩強喺特製嘅鐵籠入面進行對決，兩分鐘內睇下邊個得分較多，而如果一方成功通到對方坑渠嘅話，就會即時判以勝出。最終，兩位U12嘅參賽者施展渾身解數下，以一方通坑渠成功而獲得賽事冠軍。

賽後，普巴作為頒獎嘉賓為冠軍邀上禮物，其後大會亦安排參加者為普巴送上一份特別禮物，就係小巴手寫水牌，牌上寫有普巴嘅中文名，令普巴感到驚喜。

完成賽事後，普巴接受主持人Keyman嘅訪問，期間談到自己首次黎到香港，覺得香港夜景好靚，而香港嘅美食亦都好令佢滿意。而對於1v1比賽，普巴覺得一方面球員需要爭取進攻，但係亦絕對唔可以忽略防守。

Keyman又問到普巴最中意以咩型式黎取得入球，呢位中場直截了當咁表示：「遠射！從遠距離起腳取得入球。另外，倒掛金勾，因為呢啲都係非常特別嘅入球方式，我喺比賽入面都會盡量嘗試去以呢啲方式入球的。」訪問最後，普巴更向大家展示自己最新嘅入球慶祝動作，就係一種全新舞蹈，唔知大家又鍾唔鍾意呢？

之後，普巴更與一眾球迷見面，為佢地逐一簽名，而現場球迷超過100人，場面絕對係墟冚至極。大多前黎嘅球迷都係拎出普巴曼聯嘅球衣，而呢位轉會費最高嘅球星就為佢地慢慢簽名，又同佢地合照，表現相當親民，相信成功簽名嘅球迷都真係滿載而歸。