【最新險簽？】雲加有意用1.4億歐元收購超新星麥巴比

文：MenClub Mr.波特　　圖：互聯網
POSTED ON 06 Jun 2017


阿仙奴領隊雲加喺季尾成功擊敗聯賽冠軍車路士奪得足總盃冠軍，繼而獲得阿仙奴管理層支持，最終獲得一份2年期嘅新合同，正所謂「永續雲加不是夢」。不過，雲加自知繼續以之前嘅方式帶領阿仙奴，一定會引黎更多球迷嘅不滿，所以佢亦喺續約後承諾，一定會盡力去搵頂級巨星番黎。

由於阿仙奴來季無得踢歐聯，所以對於吸引巨星加盟變得相對困難得多，所以雲加能夠做嘅只可以增加金錢上嘅吸引性。對於一向使錢極為謹慎嘅雲加，終於有180度嘅改變，佢為左簽下有興趣嘅球員，將拎出一向唔可能喺「教授」身上出現嘅轉會費，其中摩納哥超新星麥巴比就係目前雲加全力追逐嘅球員。

較早前，有消息指雲加曾向摩納哥就現年只有18歲嘅麥巴比開出1億歐元(8700萬鎊)嘅轉會費，但係已經被對方單方面拒絕。1億歐元轉會費過去對於阿仙奴黎講絕對係不可能嘅數字，因為雲爺爺一向精打細算，而球隊歷史上轉會費最高嘅球員就係奧斯爾同山齊士，但佢地嘅轉會費分別就只係4250萬鎊同3500萬鎊，兩位球星加埋都唔夠一個麥巴比高，實在係完全顛覆左球迷們一向嘅概念。

不過更加意外嘅係，就係1億歐元轉會費被拒絕後，雲加並無放棄追逐，最新消息指佢已經為麥巴比開出1.4億歐元(1.2億鎊)轉會費，呢個轉會絕對已經係天價中嘅天價，如果成事就會即刻打破足球史上最高嘅轉會費紀錄。

當然，即使雲加比得起錢都唔一定可以得到麥巴比，因為麥巴比係目前歐洲最火熱嘅超新星，多支歐洲豪門都希望可以將佢收歸旗下，其中應屆歐聯冠軍皇馬亦已經為麥巴比開出1.35億歐元(1.18億鎊)嘅轉會費。雖然阿仙奴開出嘅轉會費更高，但係皇馬係歐洲冠軍，來季又有得踢歐聯，吸引力明顯都比阿仙奴高得多，唯獨皇馬可能唔可以100％承諾比麥巴比踢到正選，呢一點相信雲加係可以對麥巴比承諾嘅野。

麥巴比今季一共為摩納哥出戰44場比場，交出26球14次助攻，助摩納哥奪得聯賽冠軍，又成功打入歐聯4強，以18歲之齡其表現絕對係歷史級別的。對於雲加一向嘅收購喜好，麥巴比又年輕又具潛力，所以完全符合佢嘅要求，但最終能否擊敗皇馬搶得呢位新人王，真係要睇雲加嘅牙力，希望唔好又係一次險簽啦。